Марқұм Шерзаттың анасы мәлімдеме жасады

16 жастағы Шерзат Полаттың қатыгез өлтірілуі, оның туыстарына және достарына жасалған зорлық-зомбылықтар Талғар тұрғындарын шошытты. Бүгін желілерде марқұмның анасының түсірген бейнежазбасы тарады. Ол енді әрбір күні не болғанын бейнежазбаға түсіріп отырмақ, деп хабарлайды Orda.kz тілшісі.

Талғарда 4 қазан күні бір топ адам келіп дүкен иесі Қаржаубай Нұрымов, ұлы Шерзат Полат және ағасы Нұрқанатпен жанжалдасып, арты кісі өліміне ұласты. 16 жасар Шерзат Полат қаза болды.

Бұл оқиғадан соң әкесі әділ сот талап етіп, жақындарымен және бір топ адаммен Талғарда көшеге шығып, жолды жауып тастаған болатын. Осыдан кейін әкесі өзіне біреулердің қоқан-лоққы жасап жатқанын айтты. Кейін олардың үйі өртенді.

Ал тергеу ісіне келсек, 10 адам күдікті ретінде ұсталды. Сол кездегі екі әйел адам куәгер ретінде қалды. Ал желіге тараған бейнежазбаларға қатысты қылмыстық іс қозғалды.

Негізінен бұзақылық, кісі өлтіру, қоқан-лоққы жасау, қылмысты құзырлы органдарға хабарламау сынды айыптармен қылмыстық іс қозғалды. 3 пышақ, 1 мылтық айғақ ретінде алынды.

Марқұмның анасы: 

«Мен енді әр күннің қалай өткенін көрсету үшін қысқа бейнежазба жасауға шешім қабылдадым. Өйткені бұл өте ауыр. Біз біраз тынып қалдық. Оның өз себебі болды. Сол түні болған оқиғаны еске алу өте қиын. Бұл мәліметтер тергеу аясында, сұрау хаттамасында тіркелді», — деді ол.

Сонымен қатар, ол адвокаттарына алғысын білдіріп:

«Бүгін біз көп нәрсені бастан өткердік. Адвокаттардың бірі өрт туралы сұрауға кетті, екіншісі — шығуға кетті», — деді Шерзаттың анасы.

Еске сала кетейік, бұл шудан соң күдікті ретінде кейінірек ұсталғандардың бірінің анасы Қазакенова Лейла бейнеүндеу жасап, баласының оқиға орнында болмағанын айтты. Оның айтуынша БАҚ-та тараған 13 адам деген сөзге бола, адам санын толтыру үшін оның баласы мен досын ұстап әкеткен.

Еске сала кетсек, ІІМ бірінші орынбасары Бауыржан Әленов пен бас прокурор Берік Адамов және тергеу ісін қолға алған Самат Аисов 15 қазан брифинг өткізген. Ұсталғандардың кімдер екенін сол брифингте айтып берген еді. 

Шерзаттың үйі өртенген түні болған бар оқиғаны мына сілтемеден оқыңыз.