Әлиев Тоқаевқа Қарабақ үшін алғыс айтып, Құрманғазы мен Түркістанды ерекше атады

Әзербайжан президенті Ильхам Әлиев IV Шуша жаһандық медиафорумында Қазақстанның Қарабақты қалпына келтіруге көрсеткен қолдауы үшін Қасым-Жомарт Тоқаевқа алғыс айтып, Каспийдегі кез келген көлік және инфрақұрылымдық жоба Қазақстанның қатысуынсыз жүзеге аспайтынын мәлімдеді, деп хабарлайды Orda.kz.

IV Шуша жаһандық медиафорумында «Qazcontent» АҚ басқарма төрағасы Әділ Сейфуллиннің сұрағына жауап берген Әзербайжан президенті Ильхам Әлиев Қазақстанмен стратегиялық әріптестікке тоқталып, Қасым-Жомарт Тоқаевқа Қарабақты қалпына келтіруге көрсеткен қолдауы үшін алғыс білдірді.

Президенттің айтуынша, Физули қаласында қазақтың ұлы күйші-композиторы Құрманғазының есімі берілген балалар шығармашылық орталығы жұмыс істеп тұр. Бұл нысанды Қасым-Жомарт Тоқаевпен бірге ашқанын еске алды.

«Физули қаласындағы өнер орталығына қазақ халқының ұлы перзенті Құрманғазының есімі берілген. Біз бұл орталықты Президент Қасым-Жомарт Тоқаевпен бірге аштық. Қарабақты қалпына келтіруге көрсеткен қолдауы үшін бауырлас қазақ халқына шын жүректен ризамыз», – деді Ильхам Әлиев.

Сонымен қатар, Әзербайжан президенті 2024 жылы Бакуде Әзербайжан, Қазақстан және Өзбекстан Каспий теңізінің түбімен энергетикалық кабель тарту туралы келісімге қол қойғанын еске салды. Қазір жоба бойынша техникалық-экономикалық негіздеме әзірленіп жатыр. Сонымен қатар екіжақты форматта талшықты-оптикалық кабель салу жобасы жүзеге асырылуда. Оның айтуынша, бұл бастамалар өңірдегі цифрландыру мен жасанды интеллектінің дамуына серпін береді.

Сондай-ақ, ол қазақстандық мұнайдың Әзербайжан аумағы арқылы тасымалдалып жатқанын айтып, Қазақстан, Әзербайжан, Грузия және Түркия қатысатын төртжақты ынтымақтастық аясында тарифтік саясатты үйлестіру, цифрландыру және кеден рәсімдерін жеңілдету бағытында жұмыс жүргізіліп жатқанын жеткізді.

Ильхам Әлиев Қазақстанмен ынтымақтастықтың Каспий өңірі үшін стратегиялық маңызы бар екенін ерекше атап өтті.

«Қазақстанмен тығыз ықпалдастықсыз Каспийдегі бірде-бір көлік жобасын жүзеге асыру мүмкін емес», – деді Әзербайжан президенті.

Сөз соңында Әлиев жуырда Түркістан қаласына жасаған сапарын еске алып, тарихи мұраны сақтау ісіне жоғары баға берді.

«Президенттің басшылығымен Қазақстанның қол жеткізіп жатқан жетістіктеріне қуаныштымыз. Жақында тарихи Түркістан қаласына барып қайттым. Онда тарихи мұраның қаншалықты ұқыпты сақталып жатқанын көріп, ерекше әсер алдым», – деді ол.

Оқи отырыңыз:

Тоқаев Қатар әміріне әкесінің қайтыс болуына байланысты жеке көңіл айтты

АҚШ Иранға қарсы теңіз қоршауын қайта бастайды