Астана маңындағы демалыс базасында ер адам өлім аузынан қалды

Астана маңындағы Primevill демалыс базасында бассейн жанында ер адам есінен танып, ажал аузынан қалды. Куәгерлердің айтуынша, оған алғашқы көмекті кешен қызметкерлері емес, демалушылардың бірі көрсеткен, деп хабарлайды Orda.kz.

Оқиға куәгерлерінің айтуынша, зардап шеккен адамның жанында құтқарушы да, медицина қызметкері де болмаған. Демалыс базасының қызметкерлері алғашқы медициналық көмек көрсете алмаған.

«Ер адамды демалушылардың арасындағы қарапайым жігіт құтқарып қалды. Жас болса да өте салмақты екен. Барлық әрекетті өзі ұйымдастырып, ер адамдар оның айтқанын орындады. Соның арқасында әлгі жігіт қайта тыныс ала бастады», – деп жазды оқиға куәгерлерінің бірі.

Тағы бір келушінің айтуынша, зардап шеккен адам жедел жәрдем көлігімен ауыр жағдайда әкетілген.

«Балалардың көз алдында адам жан тапсырғалы жатты. Жедел жәрдем алып кеткен кезде ол тыныс алмай, көгеріп кеткен еді. Дәрігерлер аман алып қалды деп үміттенемін», – деп жазды ол.

Оқиғадан кейін әлеуметтік желілерде демалыс базасына қатысты жағымсыз пікірлер көбейді. Келушілер құтқарушылар мен медицина қызметкерлерінің жоқтығына ғана емес, қызметкерлердің дөрекі қарым-қатынасына, бассейндегі судың ластығына, душ бөлмелеріндегі антисанитариялық жағдайға және аумақтағы жағымсыз иіске де шағымданды.