Тоқаев Қатар әміріне әкесінің қайтыс болуына байланысты жеке көңіл айтты

Президент Қасым-Жомарт Тоқаев Дохаға арнайы барып, Қатар әмірі шейх Тамим бен Хамад Әл Таниге әкесі – әмір-әке шейх Хамад бен Халифа Әл Танидің дүниеден өтуіне байланысты жеке көңіл айтты, деп хабарлайды Orda.kz.

Қасым-Жомарт Тоқаев Дохаға арнайы барып, Қатар әмірі шейх Тамим бен Хамад Әл Танимен кездесті. Мемлекет басшысы әмірге және билеуші әулет мүшелеріне әмір-әке шейх Хамад бен Халифа Әл Танидің қайтыс болуына байланысты көңіл айтып, оның Қатардың дамуына және Қазақстанмен арадағы қарым-қатынастың нығаюына қосқан үлесін ерекше атап өтті.

Президенттің айтуынша, шейх Хамад Қатар мемлекетін қуатты әрі табысты елге айналдыруда тарихи рөл атқарған.

«Қазіргі Қатардың көптеген тарихи жетістігі мен халықаралық аренадағы жоғары беделі шейх Хамадтың есімімен тығыз байланысты. Шейх Хамад әлемдік деңгейдегі мемлекет қайраткері әрі қазақ халқына шынайы жанашыр болған тұлға», – деді Тоқаев.

Мемлекет басшысы шейх Хамад бен Халифа Әл Танидің Қазақстан мен Қатар арасындағы стратегиялық әріптестіктің қалыптасуына зор үлес қосқанын айтты. Оның Қазақстанға екі рет ресми сапармен келгенін еске алған Президент алғашқы сапары кезінде Сыртқы істер министрі қызметінде болып, Қатар әмірін өзі қарсы алғанын жеткізді.

Сондай-ақ, Тоқаев шейх Хамадтың бастамасымен Астанада Әл-Фараби атындағы мешіт салынғанын, сондай-ақ Қазақстан тәуелсіздігінің алғашқы жылдарында бірқатар әлеуметтік және инфрақұрылымдық жобалардың жүзеге асырылғанын ерекше атап өтті.

«Мұның бәрі Қазақстан мен Қатар арасындағы шынайы достық пен өзара түсіністіктің айқын дәлелі. Біз мұны әрдайым жоғары бағалаймыз», – деді Президент.

Өз кезегінде Қатар әмірі шейх Тамим бен Хамад Әл Тани Қазақстан Президентіне арнайы келіп, көңіл айтқаны үшін алғыс білдірді. Оның айтуынша, Тоқаевтың бұл сапары Қазақстан мен Қатар халықтары арасындағы бауырластық қатынастың ерекше сипатын көрсетеді.

Кездесу барысында Қатар тарапының бастамасымен қазіргі халықаралық ахуал, оның ішінде Таяу Шығыстағы жағдай жөнінде пікір алмасу өтті.

Сонымен қатар, Қасым-Жомарт Тоқаев Қатар әмірін өзіне қолайлы уақытта Қазақстанға ресми сапармен келуге шақырды, Шейх Тамим бен Хамад Әл Тани бұл шақыруды ризашылықпен қабыл алды.

Оқи отырыңыз:

Инвестиция көлемі 9,5 триллион теңге: Тоқаев премьер-министрдің есебін тыңдады

АҚШ Иранға қарсы теңіз қоршауын қайта бастайды