25 жыл түрмеде отырған «балталы маньяк» бостандықта қайтадан әйелге шабуыл жасады

Петропавлда 62 жастағы ер адам әйелге шабуыл жасады деген күдікпен ұсталды. Бұған дейін ол адам өлтіру мен зорлау қылмыстары үшін 25 жылға сотталған, деп хабарлайды Orda.kz.

КТК телеарнасынының мәліметінше, оқиға 54 жастағы қала тұрғыны саяжайдан үйіне қайтып келе жатқан кезде болған. Әйелдің айтуынша, белгісіз ер адам оған шабуыл жасап, қылқындыруға әрекеттенген. Алайда жәбірленуші көмекке шақырып айқайлаған соң күдікті оны жіберіп, әйел қашып құтылған.

Солтүстік Қазақстан облысы полиция департаменті тергеу басқармасының бастығы Азат Құсайыновтың айтуынша, күдікті жедел іздестіру шаралары барысында қолға түскен.

«Жедел іздестіру нәтижесінде күдікті анықталып, ұсталды. Ол – облыс орталығының 62 жастағы тұрғыны. Тергеу сотының санкциясымен оған қамауда ұстау түріндегі бұлтартпау шарасы қолданылды», – деді Азат Құсайынов.

Артынша ұсталған кезінде «балталы маньяк» атанған Валерий Кричиневский болып шыққан. Ол 1990-жылдары бірнеше адамды өлтіргені және зорлағаны үшін сотталған. Тергеу деректеріне сәйкес, ұсталғанға дейінгі соңғы құрбаны жеті жасар қыз болған.

2024 жылы Кричиневский жазасын толық өтеп, бостандыққа шыққан. Босап шыққаннан кейін ол әлеуметтік бейімдеу орталығында тұрған және электронды бақылау білезігін тағып жүрген екен.