МӘМС-пен тегін жасалатын ота үшін 8 млн теңге алған хирургтің ісі сотқа жолданды

Атырауда хирург дәрігер пациенттерден МӘМС аясында тегін жасалуы тиіс операциялар үшін ақша алып отырған деген күдікке ілінді. Тергеу мәліметінше, ол үш жыл ішінде 42 науқастан 8 млн теңгеден астам қаражат алған, деп хабарлайды Orda.kz.

Тергеу мәліметінше, дәрігер 2023–2025 жылдары «Family Health Clinic» ЖШС мен «Ким В.» жеке клиникасында жұмыс істеген. Осы уақыт аралығында ол пациенттерге варикозға жасалатын операциялардың Міндетті әлеуметтік медициналық сақтандыру (МӘМС) аясында тегін жүргізілетінін айтпай, қызмет ақысын өзінің банк шотына аудартқан.

Сонымен қатар, DamuMed жүйесіне бұл операциялар тегін медициналық көмек ретінде көрсетілгені туралы мәлімет енгізілген. Соның негізінде медициналық ұйымдар Әлеуметтік медициналық сақтандыру қорынан тиісті қаржыны алған. Осылайша бір медициналық қызметтің ақысы екі рет төленген: бір рет – МӘМС қоры есебінен, екінші рет – пациенттердің жеке қаражатынан.

Бұдан бөлек, күдіктінің қызметтік міндетін орындағаны үшін пациенттерден заңсыз ақшалай сыйақы алғаны да анықталған. Қазіргі уақытта күдіктіге елден шықпау және тиісті мінез-құлық туралы қолхат түріндегі бұлтартпау шарасы қолданылған әрі іс сотқа жолданды.

Оқи отырыңыз:

25 жыл түрмеде отырған «балталы маньяк» бостандықта қайтадан әйелге шабуыл жасады

Психиатриялық ауруханаға жіберілген экс-дін қызметкері Воронцов қайтадан тергеу изоляторына қайтарылды