Жамбыл облысында аурухана қызметкерлері кәріз құдығына түсіп, екі адам қаза тапты

Жамбыл облысының Шу қаласында аурухананың үш қызметкері кәріз құдығына түсіп, газға уланды. Олардың екеуі оқиға орнында көз жұмды, ал біреуі ауруханаға жеткізілді, деп хабарлайды Orda.kz.

Қайғылы оқиға Шу қаласындағы медициналық мекемелердің бірінің аумағында болған екен.

Облыстық полиция департаментінің мәліметінше, алдымен кәріз жүйесін жөндеуге түскен сантехник құдық ішінде тұншығып, көмекке шақырған. Оның дауысын естіген зертхана қызметкері әріптесін құтқару үшін тереңдігі шамамен үш метр болатын кәріз құдығына түскен. Алайда ол да газға уланып, есінен танып қалған. Кейін екі әріптесін құтқармақ болған үшінші қызметкер де құдыққа түсіп, сыртқа шыға алмай қалған.

Салдарынан екі адам оқиға орнында қаза тапты. Ал алғашқы болып құдыққа түскен сантехник аман қалып, медициналық мекемеге жеткізілді. Қазір оған дәрігерлер қажетті көмек көрсетіп жатыр.

Полиция аталған дерек бойынша сотқа дейінгі тергеп-тексеруді бастады. Оқиғаның мән-жайы мен қызметкерлердің қауіпсіздік талаптарының сақталуы анықталып жатыр.

Оқи отырыңыз:

Заңгер әрі блогер Әділетхан Молдахан 2 жыл 6 айға бас бостандығынан айырылды

Атырауда қайын жұртын қырып салған күйеу бала өмір бойына бас бостандығынан айырылды