СҚО-да жантүршігерлік жол апатынан сегіз адам зардап шекті, оның алтауы бала

Солтүстік Қазақстан облысында болған ауыр жол-көлік оқиғасы салдарынан сегіз адам зардап шеті, көлік ішінде болған балалар да жарақат алды, деп хабарлайды Orda.kz.

Апат салдары түсірілген бейне әлеуметтік желілерде тарады. Видео авторының айтуынша, зардап шеккен жүргізуші көліктен бірнеше метр жерде жатқан, ал қозғалтқыш ондаған метрге ұшып кеткен.

Шетелдік көліктен түк қалмай, темір үйіндісіне айналған. Алдын ала мәлімет бойынша, көліктердің бірінде алты бала болған, олардың барлығы түрлі жарақатпен ауруханаға жеткізілді. Облыстық денсаулық сақтау басқармасы баспасөз қызметі олардың жағдайы туралы кейінірек хабарлайтынын мәлімдеді.

Облыстық полиция департаментінің баспасөз қызметі Mazda және Toyota Estima көліктері қатысқан жол апаты Петропавл – Көкшетау тасжолында, Аққайың ауданына қарасты Астраханка ауылының маңында болғанын растады.

«Апат салдарынан Mazda жүргізушісі мен Toyota Estima көлігі салонында болған жеті адам медициналық мекемелерге жеткізілді. Аталған дерек бойынша қылмыстық іс қозғалды. Қазіргі уақытта оқиғаның мән-жайы анықталуда. Тергеу нәтижесі бойынша процессуалдық шешім қабылданады»,  деп түсіндірді СҚО полиция департаменті. 

Полиция қызметкерлері жүргізушілерге жылдамдық режимін қатаң сақтау, жол және ауа райы жағдайларын ескеру, қарсы жолаққа шықпау және рөлде барынша мұқият болу қажеттігін еске салды.

Оқи отырыңыз:

• Астана маңында көлік карьерге батып, екі бала қаза тапты
• Данияр Елеусінов Астанада екі жол апатына қатысы бар деген күдікпен ұсталды
• Заңгер әрі блогер Әділетхан Молдахан 2 жыл 6 айға бас бостандығынан айырылды