Елімізде жаңа eGov іске қосылды: Бұрынғыдан қандай айырмашылығы бар?

Жасанды интеллект және цифрлық даму министрі Жасұлан Мәдиев Үкімет отырысында Қазақстандағы негізгі цифрлық сервистің қалай жаңартылғаны туралы баяндама жасады, деп хабарлайды Orda.kz.

Жақында мемлекеттік қызметтер порталының жаңартылған нұсқасы – eGov 3.0 іске қосылды. Жаңа жүйе QazTech платформасында жұмыс істейді. Бұл платформа Қазақстандағы болашақ ақпараттық жүйелердің барлығына ортақ негіз болады. Қолданыстағы сервистер де кезең-кезеңімен осы платформаға көшіріледі.

Мемлекеттік қызметтердің бір бөлігі жаңа форматқа ауыстырылды. Сонымен қатар порталдың өзінде кері байланыс тетігі пайда болды. Енді пайдаланушылар қай қызметті жеңілдету қажет екенін өз ұсыныстары арқылы хабарлай алады. Министр үздік ұсыныстар сервисті одан әрі жетілдіру кезінде ескерілетінін айтты.

«Мемлекеттік қызмет көрсету саласында үлкен жолдан өттік. Компьютердегі мемлекеттік қызметтер порталынан мобильді қосымшаға көштік. Кейін eGov-тағы жасанды интеллект көмекшісі мен мемлекеттік қызметтер бойынша кеңес беретін 1414 жасанды интеллект байланыс орталығы пайда болды. Бұл кезең-кезеңімен жүзеге асқан өзгерістер халықаралық деңгейде де мойындалды», – деді министр. 

Оның айтуынша, осы цифрлық өзгерістер нәтижесінде Қазақстан Біріккен Ұлттар Ұйымының электронды үкіметті дамыту жөніндегі рейтингінде 24-орынға көтерілген.

Сәуір айынан бастап eGov-та интеллектуалды цифрлық көмекші – eGov GPT жұмыс істеп келеді. Ол қажетті қызметті немесе мемлекеттік органды қолмен іздеудің орнына пайдаланушының мәселесін өз сөзімен сипаттауына мүмкіндік береді. Жүйе адамның қандай қызмет қажет екенін өзі анықтап, өтінішті дайындайды және істі нәтижеге дейін жеткізеді.

Қазіргі уақытта eGov GPT арқылы азаматтарға ең көп қажет болатын 50 мемлекеттік қызмет қолжетімді. Бұл азаматтардың барлық өтініштерінің шамамен 30 пайызына тең. Министрлік жыл соңына дейін бұл көрсеткішті 70 пайызға жеткізуді жоспарлап отыр.

Яғни мемлекеттік органдар бірыңғай жүйені айналып өтіп, өздеріне жеке жасанды интеллект көмекшілерін құра алмайды.

eGov GPT жүйесін Қазақстанның ұлттық мессенджері Aitu платформасына да енгізу жоспарланып отыр.

Бұған дейін 2026 жылғы 12 шілдеден бастап қазақстандықтар eGov жүйесі арқылы өздерінің жеке деректерін қай мемлекеттік органдар сұратқанын көре алатынын жазғанбыз.

Оқи отырыңыз:

• eGov.kz жүйесіндегі бөгде аккаунт ашылып кеткен жағдай тексеріліп жатыр
• Цифрлық із: Қазақстандықтар eGov-та өз деректерін кім сұратқанын көре алады
• Еңбек келісімшарттарын енді eGov арқылы істеуге болады