«Крыша боламын» деп 30 млн теңге талап еткен ММА жаттықтырушысы ұсталды

Ақмола облысында кәсіпкерден 30 млн теңге бопсалады деген күдікпен екі ер адам ұсталды. Олардың біреуі ММА жаттықтырушысы болып шыққан. Бұл туралы полиция департаментінің баспасөз қызметіне сілтеме жасап  Orda.kz хабарлайды.       

5 тамызда полицияға белгісіз адамдардың күш қолданамыз деп қорқытып, кәсіпкерден 30 млн теңге талап еткені туралы ақпарат түскен.

Осы факт бойынша бопсалау бабымен сотқа дейінгі тергеу басталды. Жедел-іздестіру шаралары барысында Ақмола облысы полиция департаментінің ұйымдасқан қылмысқа қарсы күрес басқармасының қызметкерлері екі ер адамның жеке басын анықтап, оларды ұстады. Ұсталғандардың бірі ММА жаттықтырушысы екені анықталды.

«Алдын ала мәлімет бойынша, ұсталғандар жәбірленушінің бизнесін «қорғағаны» үшін ақша талап етуге қатысы болуы мүмкін. Қазіргі уақытта олардың қылмысқа қатыстылығы сотқа дейінгі тергеу аясында анықталып жатыр»,  деп хабарлады полиция. 

Күдіктілер ұсталып, уақытша ұстау изоляторына қамалды. Қазір оқиғаның барлық мән-жайын анықтауға бағытталған қажетті тергеу әрекеттері жүргізіліп жатыр.

Сонымен қатар полиция ұсталғандардың облыс аумағында жасалған басқа да осыған ұқсас қылмыстарға қатысы бар-жоғын тексеруде. Полиция бопсалаудың қылмыстық құқық бұзушылық екенін атап өтті. Оқиғаның барлық мән-жайы сотқа дейінгі тергеу барысында анықталады.

Кінәсіздік презумпциясы қағидатына сәйкес, күдіктілердің кінәсі заңды күшіне енген сот үкімімен ғана анықталуы мүмкін.

Оқи отырыңыз:

• Парсы шығанағында тұрып қалған кемелер әлемді экологиялық апатқа ұшырата ма?
• Қазақстанда жол ережесін бұзатындарға тұзақ көбейді: Дрон, камера және лазер іске қосылды