Цифрлық із: Қазақстандықтар eGov-та өз деректерін кім сұратқанын көре алады

2026 жылғы 12 шілдеден бастап қазақстандықтар eGov жүйесі арқылы өздерінің жеке деректерін қай мемлекеттік органдар сұратқанын көре алады, деп хабарлайды Orda.kz.        

Сонымен қатар жеке кабинеттен электрондық цифрлық қолтаңбаны (ЭЦҚ) бірден бұғаттау мүмкіндігі пайда болады.

Тиісті бұйрыққа вице-премьер, сондай-ақ жасанды интеллект және цифрлық даму министрі Жасұлан Мәдиев қол қойған. Жаңа талаптар 11 шілдеден бастап күшіне енетін Цифрлық кодекс негізінде әзірленген.

Жаңартылған жеке кабинетте «цифрлық оқиғалар» деп аталатын жүйе енгізіледі. Бұл дегеніміз — мемлекеттік органдар азаматтың жеке деректеріне жасаған әрбір сұраныс пайдаланушының профилінде көрініс табады. Бұрын мұндай ақпарат азаматтарға қолжетімді болмаған.

Сонымен қатар жүйеде алынған барлық мемлекеттік қызметтердің толық журналы пайда болады. Онда азаматтың қандай өтініштер бергені, олардың қай кезеңде тұрғаны,  қандай әрекеттер орындалғаны көрсетіледі.

Хабарландыру жүйесі жаңарады. Жаңа өзгерістерге сәйкес, eGov маңызды оқиғалар, өтініш мәртебесінің өзгеруі және деректерге жасалған сұраныстар туралы push-хабарлама, SMS немесе электрондық пошта арқылы міндетті түрде хабарлап отырады. Пайдаланушылар қауіпсіздік пен хабарландыру параметрлерін өздері реттей алады.

Соңғы жылдары алаяқтар бөтен адамдардың ЭЦҚ-сын пайдаланып, олардың атына онлайн несие рәсімдеу жағдайлары жиілеген. Жаңа мүмкіндік осы қауіптің алдын алуға бағытталған.

Бұған дейін ашық қолжетімділікке 16,3 миллион қазақстандықтың жеке деректері жарияланған архив тарағаны туралы ақпарат шыққан еді. Онда ЖСН, толық аты-жөні, туған күні, мекенжайы және 17 миллионнан астам телефон нөмірлері болған.

Сарапшылар мұндай деректердің таралуы фишинг, құжаттарды қолдан жасау және eGov пен мобильді банктердегі аккаунттарға шабуыл жасау қаупін арттыратынын ескертеді.

Жаңа өзгерістер азаматтардың жеке деректерін қорғауды күшейтіп, мемлекеттік қызметтердің ашықтығын арттыруға бағытталған. Енді әрбір қазақстандық өз мәліметтерінің қалай және кім тарапынан пайдаланылып жатқанын бақылап отыра алады.

Еске салсақ, Қазақстандағы ХҚКО-лардан тағы бір қызмет алынып тасталды. Қазақстанда еңбек мигранттарына арналған мемлекеттік қызмет толықтай онлайн форматқа көшірілді.

Бұл туралы 2026 жылғы 11 сәуірде ҚР жасанды интеллект және цифрлық даму министрлігінің баспасөз қызметі хабарлады.

Ведомство мәліметінше, осы жылдың 13 сәуірінен бастап бұл мемлекеттік қызмет Халыққа қызмет көрсету орталықтарында (ХҚКО) көрсетілмейді. Енді өтінімді тек онлайн режимде eGov.kz порталы немесе migration.enbek.kz платформасы арқылы беруге болады.

Оқи отырыңыз:

• Енді төлқұжат пен жүргізуші куәлігін ХҚКО бермейді
• Петицияларға қол қою eGov ұялы телефоны арқылы қолжетімді
• ХҚКО-лардың қызметі азайып, бәрі онлайн форматқа өтіп жатыр