Нұрай Серікбайдың өлімі: Прокурор күдіктіге өмір бойына бас бостандығынан айыру жазасын сұрады

Шымкент қаласының мамандандырылған ауданаралық сотында Нұрай Серікбайдың өліміне қатысты қылмыстық іс бойынша жарыссөз басталды, деп хабарлайды Orda.kz.        

Мемлекеттік айыптаушы соттан айыпталушы Шерхан Аймаханға өмір бойына бас бостандығынан айыру жазасын тағайындауды сұрады.

«Жәбірленуші тараптың барлық берген жауабы толықтай расталды деп есептеймін. Серікбайдың Аймаханға ешқандай наразылығы жоқ екенін айтқан бейнежазбасын назарға алмауды сұраймын. Сараптама нәтижесі қыздың бейнежазба кезінде алдын ала жаттап алған мәтінді айтқанын көрсетті. Оның бейнежазбада сөздерін ұмытып қалған сәттерін бәріміз көрдік.
Құрметті сот, жазаны жеңілдететін мән-жайлар анықталған жоқ. Соттан түпкілікті түрде өмір бойына бас бостандығынан айыру жазасын тағайындауды сұраймын», – деді прокурор Мадияр Әбілқасымов. 

Бұған дейін Шымкенттегі Нұрай Серікбайдың өліміне қатысты сот отырысында сот-медициналық сарапшы сөз сөйлеп, марқұмға салынған пышақ жарақаттарына кәсіби тұрғыда баға берді. Оның айтуынша, ең ауыр әрі өлімге әкелуі мүмкін жарақаттар кеуде қуысы мен іш қуысына өткен терең жарақаттар.

Сонымен қатар марқұм Нұрай Серікбайдың отбасы сотталушыдан 10 млрд теңгеден астам өтемақы өндіріп алуды талап етті. Қаза тапқан қыздың ағасы Сұлтан отбасының неге дәл осындай қаражат талап етіп отырғанын түсіндірді.

Оның алдындағы сот отырысында марқұмның әкесі Бауыржан Сағымбек қызының қаза болған күні болған соңғы әңгімесін айтып берген болатын.

Оқи отырыңыз:

• Нұрай Серікбайға аяусыз сілтенген пышақ: Сот-медициналық сарапшы кәсіби баға берді
• Нұрай Серікбайдың өлімі үшін 10 млрд теңге өтемақы: Марқұмның ағасы отбасы талабын түсіндірді
• «Әке, мені алып кетші»: Нұрай Серікбайдың әкесі сотта қызының соңғы сөзін айтты