Алматыда LRT желісі 2027 жылдың соңында іске қосылады

Алматыда жеңіл рельсті көлік жүйесін (LRT) 2027 жылдың соңында іске қосу жоспарланып отыр, деп хабарлайды Orda.kz.         

Қазір жоба аясында болашақ желінің бағыты өтетін аумақтардағы инженерлік коммуникацияларды қайта орналастыру жұмыстары жүргізілуде.

Бауыржан Момышұлы көшесінің бойында, соның ішінде болашақ депо орналасатын аумақта, 39 инженерлік желіні қайта құру қажет. Оның төртеуі бойынша жұмыс аяқталған.

Төле би көшесінде 269 инженерлік коммуникация қайта орналастырылады. Қазіргі уақытта оның 34-і бойынша жұмыстар аяқталды. Ал Абылай хан даңғылының бойында 67 инженерлік желі қайта құрылмақ.

Егер инженерлік желілерді ауыстыру кезінде көлік қозғалысын шектеу қажет болса, көліктер қарама-қарсы бағыттағы жолақтардың бірімен өткізілетін болады. Әдетте мұндай шектеулер жекелеген учаскелерде бір-екі күннен аспайды.

Инженерлік коммуникацияларды қайта орналастыру  LRT желісін салуға дайындықтың маңызды кезеңдерінің бірі. Аумақтар босатылған сайын онда желі құрылымдарын салу, шпалдар мен рельстерді төсеу және басқа да жұмыстар басталады.

Құрылыс жұмыстарын қыс мезгілінде де жалғастыру жоспарланып отыр. Ауа температурасы нөлден төмен болған жағдайда топырақты қатып қалудан қорғау, қысқы бетондау технологияларын қолдану, құрылымдарды жылыту және бетонның қажетті беріктік деңгейіне жетуін қамтамасыз ету шаралары жүргізіледі.

Жобаға сәйкес,  LRT желісінің бірінші кезеңі Алатау ауданындағы индустриялық аймақта, Мөңке би және Бауыржан Момышұлы көшелерінің маңындағы деподан басталады. Одан әрі желі Бауыржан Момышұлы көшесімен Төле биге дейін, кейін Төле би көшесімен шығыс бағытта Абылай хан даңғылына дейін жалғасады. Одан әрі Абылай хан даңғылы арқылы Алматы-2 теміржол вокзалына дейін жетеді. Соңғы станция «Райымбек батыр» көлік ауыстырып міну торабы болады.

Бірінші кезеңнің бүкіл желісі жер үстімен өтеді, эстакадалар салынбайды. Қажет болған жағдайда қолданыстағы көпір құрылыстары күшейтіледі.

LRT  іске қосылғаннан кейін Бауыржан Момышұлы және Төле би көшелеріндегі ортаңғы екі жолақ тек пойыздардың қозғалысына беріледі. Олар жол жиегімен бөлінеді. Бұл қоғамдық көлікке басымдық беріп, оның қозғалысын тұрақты әрі жылдам етуге және жол-көлік оқиғалары қаупін азайтуға мүмкіндік береді.

Пойыздардың техникалық тұрғыдағы ең жоғары жылдамдығы сағатына 65–70 шақырым. Алайда аялдамалардың арасы шамамен 700 метр болғандықтан, орташа жылдамдық сағатына 30–35 шақырым деңгейінде болады.

Бұған дейін LRT құрылысына байланысты Алматының кейбір бөліктерінде электр жарығы, интернет және байланыс уақытша өшуі мүмкін екені хабарланған болатын.

Оқи отырыңыз:

• Алматыда BRT құрылысы тоқтатыла тұрып, LRT жобасы жүзеге асырылады
• ЛРТ және «кірешілер»: арқанмен вагон сүйреген жұмысшылар мемге айналды
• Астанада іске қосылардан бұрын LRT жүйесінің қалай жұмыс істейтіні таныстырылды