eGov.kz жүйесіндегі бөгде аккаунт ашылып кеткен жағдай тексеріліп жатыр

Әлеуметтік желілерде бір ер адам eGov.kz порталына QR-код арқылы кірген кезде жүйе қателесіп, өзге адамның жеке кабинетін ашып бергеніне наразылық білдірді, деп хабарлайды  Orda.kz.       

Желі қолданушысы қазақстандық eGov жүйесінде өзге адамның аккаунтына кездейсоқ кіріп кеткенін мәлімдеді. Әлеуметтік желілерде бұл жазба қызу талқылануда. Оның айтуынша, ол өз аккаунтына кіруге тырысқанда, кездейсоқ басқа адамның профиліне кіріп кеткен.

Threads желісінде sherkhan_kairatuly лақап атымен жарияланған жазбада қолданушы өз таңданысын жасырмайды. Ол QR-код арқылы жүйеге кірген сәтте экранда бөтен адамның деректері шыққанын видеомен көрсетті.

«Мен өз eGov-ыма QR арқылы кірдім, бірақ ішінде басқа бір адамның деректері тұр. Бұл қалай жұмыс істейді өзі? Қауіпсіздік бойынша осындай үлкен олқылық қалай болуы мүмкін?» – дейді видео авторы. 

Бұл жағдай желі қолданушылары арасында алаңдаушылық туғызды. Көпшілік мемлекеттік сервистердің қауіпсіздігіне күмән келтіре бастады.

Аталған оқиғаға «Азаматтарға арналған үкімет» мемлекеттік корпорациясы мен eGov.kz порталының ресми өкілдері де пікір білдірді. Олар қолданушымен жеке байланысқа шыққанын хабарлады.

«Сәлеметсіз бе! Бұл — eGov.kz. Біз сізбен жеке хабарламалар арқылы байланысқа шығып, ақпаратты тексеру үшін мамандарға жолдадық. Тексеру нәтижесі бойынша міндетті түрде кері байланыс береміз» деп жазылған ресми жауапта. 

Қазіргі уақытта аталған жағдай бойынша тексеріс жүргізілуде. Нәтижесі жарияланғаннан кейін мәселенің нақты себебі мен қауіпсіздікке қатысты шаралар белгілі болады.

Мамандардың хабарлауынша, қазіргі таңда жүйедегі ықтимал ақаулар жан-жақты зерттеліп жатыр. Тексеру нәтижелері бойынша қосымша ақпарат беріледі.

Оқи отырыңыз:

• Қарин өнер өкілдерін қорғап, әншілерді «шайтанның жаршылары» деген ер адамды айыптады
• Тоғыз тонналық титан құймасын ұрлады деген күдікті 10 жылдан кейін Алматыда ұсталды