Сирияның бұрынғы президенті Башар Асад сырттай өлім жазасына кесілді

Сирия соты 2024 жылғы желтоқсанда биліктен құлатылып, Мәскеуге қашып кеткен елдің бұрынғы президенті Башар Асадты сырттай өлім жазасына кесті, деп хабарлайды Orda.kz    Сирияның SANA ақпарат агенттігіне сілтеп.

Сот Асадты елдегі азаматтық соғыс кезінде әскери қылмыстар мен адамзатқа қарсы қылмыс жасады деп таныды. Соттың пайымдауынша, 2011 жылы Дераа провинциясындағы наразылықтарды аяусыз басу адамзатқа қарсы қылмыс ретінде бағаланатын оқиғалармен қатар жүрген.

Дәл осы наразылықтарды күшпен басу кейін Сирияда қантөгіске ұласқан азаматтық қақтығыстың басталуына себеп болды. Кейін бұл қақтығыс Ресей сияқты басқа мемлекеттердің де қатысуымен ауқымды соғысқа айналды.

Өлім жазасына Башар Асадтың немере ағасы Атеф Наджиб те кесілді. Ол Дераа провинциясындағы саяси қауіпсіздік басқармасын басқарған. Наджиб былтыр қаңтар айында ұсталып, қамауға алынған. Сот үкімі шығарылған кезде ол сот залында тордың ар жағында отырған.

Башар Асад биліктен кеткеннен кейін отбасымен бірге Сириядан Ресейге қашып, Мәскеуден баспана алған. Былтыр қыркүйекте Сирия соты оны қамауға алуға ордер шығарған болатын.

Оқи отырыңыз:

• Башар Асад Сириядан қашып кетіп, ұшақ апатынан қайтыс болуы мүмкін бе?
• «Асад режимі құлағаннан кейін»: Сирияда тоқтаған халықаралық рейстер қайта ұша бастады
• Ұлыбритания Башар Асадтың әйелін қабылдаудан бас тартты