Прокуратура талабымен: Атырау облысында полицейлерді соққыға жығып, бостандықта жүргендер сотталды

Атырау облысының Мақат ауданында көктемде болған жаппай төбелес кезінде полицейлер соққыға жығылған еді. Осы іске қатысқан үш адамға қатысты сот үкімі қайта қаралып, олар нақты бас бостандығынан айырылды, деп хабарлайды Orda.kz.       

Оқиға 3 сәуір күні кешкі сағат 22:00 шамасында болған. Мақат ауданында шақырту бойынша полиция қызметкерлері оқиға орнына барған. Сол жерде олар ішімдікке мас бір топ ер адамға тап болған.

Олар полиция қызметкерлеріне қарсылық көрсетіп шабуыл жасаған. Жанжал кезінде жұдырықтасып қана қоймай, ағаш таяқ пен тас қолданылған.

Оқиға салдарынан екі полиция қызметкері зардап шекті. Олардың біріне орташа ауырлықтағы дене жарақаты келтірілген.

Алғашқы сот үкімі бойынша үш азаматқа да бас бостандығын шектеу жазасы тағайындалған болатын. Қызылқоға аудандық соты Б. және А. есімді азаматтардың әрқайсысын төрт жылға, ал Ж.-ны үш жыл алты айға бас бостандығын шектеуге соттаған. Осылайша үшеуі де бостандықта қалған.

Алайда бұл шешіммен Бас прокурордың орынбасары келіспей, сот актілеріне наразылық білдірген. Кассациялық алқа сот тағайындаған жазаның қылмыстың ауырлығына сәйкес келмейтіні туралы қорытындыға келді.

Нәтижесінде бас бостандығын шектеу жазасы нақты бас бостандығынан айыру жазасына ауыстырылды. Б. және А. төрт жылға, ал Ж. үш жыл алты айға бас бостандығынан айырылды.

Осылайша, сот залынан үшеуін де күзетпен алып кетті.

Оқи отырыңыз:

• «Крыша боламын» деп 30 млн теңге талап еткен ММА жаттықтырушысы ұсталды
• Медициналық сақтандыру қорынан 3,5 млрд теңгеден астам қаржы ұрланған