Құрылтай сайлауы: Алғашқы командалық теледебат тікелей эфирде көрсетіледі

Тікелей эфирде Құрылтайға өтетін алғашқы тарихи сайлауға қатысып жатқан жеті саяси партияның өкілдері пікірталасқа түседі, деп хабарлайды Orda.kz.       

12 тамыз күні сағат 20:00-де Jibek Joly телеарнасында алғашқы командалық теледебат өтеді. Командалық теледебаттың негізгі тақырыбы – «Әділетті қоғамның негізі ретінде заң үстемдігі («Заң және тәртіп» қағидаты)».

Дебатта «Әділет» партиясының атынан Айжан Аймағанова мен Мәди Мырзағараев сөз сөйлейді. Жалпыұлттық социал-демократиялық партияны Лариса Ли мен Нұрайнаш Камалова, «Байтақ» партиясын Амалбек Өміртай мен Алмат Тұртаев таныстырады.

Қазақстан Халық партиясының өкілдері Жандос Бидайбеков пен Ирина Смирнова болса, «Ауыл» партиясынан Жазира Сұлтанқұлова мен Ерболат Саурықов қатысады.

«Ақ жол» партиясының атынан Бек-Мұхамед Жәукебаев пен Ермек Әбілдин, ал Respublica партиясынан Олжас Құспеков пен Динара Шүкіжанова пікірталасқа шығады.

Телеарнаның хабарлауынша, дебатқа қатысушылар сайлаушыларды дәл өз партияларына қолдау көрсету қажет екеніне сендіруі тиіс.

Эфир барысында партиялардың сайлауалды бағдарламалары жан-жақты талданып, оппоненттерге ең өзекті сұрақтар қойылады. Сонымен қатар әр партия өз өкілеттік мерзімі ішінде орындауға міндеттенетін бір нақты уәдесін жариялайды.

Тікелей эфир кезінде көрермендер экрандағы QR-кодты сканерлеу арқылы немесе WhatsApp арқылы дебат қатысушыларына өз сұрақтарын жолдай алады.

11 тамызда Jibek Joly телеарнасының тікелей эфирінде алғашқы командалық теледебатқа қатысушылардың сөз сөйлеу тәртібін анықтаған ашық жеребе өтті.

Жеті саяси партия өкілдерінің сахнаға шығу реті төмендегідей:

• «Ақ жол»
• Жалпыұлттық социал-демократиялық партия
• «Әділет»
• Қазақстан Халық партиясы
• «Ауыл»
• «Байтақ»
• Respublica.

Алғашқы командалық теледебатты 12 тамыз күні сағат 20:00-де Jibek Joly телеарнасының тікелей эфирінен, сондай-ақ телеарнаның ресми YouTube арнасынан көруге болады.

Бұған дейін Qazaqstan телеарнасында ұлттық теледебаттың алғашқы кезеңі өтті. Оған жеті саяси партияның өкілдері қатысып, сайлауалды бағдарламаларын таныстырды

Оқи отырыңыз:

• Құрылтай: Сайлауалды науқан басталды, партиялар өңірлерге шықты
• ОСК Құрылтай депутаттарын сайлауға арналған бюллетенді көрсетті
• Құрылтай сайлауы: Партиялар ұлттық теледебатта өз бағдарламаларын таныстырды