Қамауда отырған Мәсімовке шұғыл түрде ота жасалды

ҰҚК-нің бұрынғы басшысы Кәрім Мәсімовке операция жасалды. Ол Астанадағы сот процестерінің бірінде құлап қалған. Мәсімов ауруханаға жедел жәрдем көлігімен жеткізілді.

«Көптеген халықаралық мәлімдемелер мен Біріккен Ұлттар Ұйымының ерікті ұстау жөніндегі жұмыс тобы Мәсімовті дереу босатуға шешім қабылдағанына қарамастан, оның бір жылдан астам түрмеде отыруы алаңдатарлық жағдай. Ол сот процесінде құлап, 30 қаңтарда ота жасатуға мәжбүр болды» деп хабарлайды Мәсімовтің PR қызметі.

Кәрім Мәсімов 6 ақпан күні түрмеге қайтарылған. Еске салайық, ҰҚК экс-басшысының соты Астанада өткен президент сайлауының алдында басталған болатын.

Мәсімовтің әрекеттері қылмыстық кодекстің 1-бөлігінің 175-бабы (мемлекетке опасыздық жасау), 3-бөлігінің 179-тармағы (билікті күшпен басып алу) және 4-бөлігінің 362-бабы 3-тармағы (билік пен лауазымдық өкілеттіктерді асыра пайдалану) бойынша сараланған.

Айта кетейік, бұл іс қалалық сотта «өте құпия» деген белгімен қаралады.