Атыраудағы қасірет: Үш жасар қыз анасының өліміне куә болған

Атырауда полиция төрт баланың анасы, 42 жастағы Алмагүл Шымырованың аса қатыгездікпен өлтірілгенін тергеп жатыр. Қылмыс әйелдің өз пәтерінде жасалған. Негізгі күдікті – оның 38 жастағы азаматтық некедегі күйеуі, деп хабарлайды Orda.kz.

Марқұм шағын дүкеннің иесі болған. Туыстарының айтуынша, ер адам бұған дейін де үйде жиі жанжал шығаратын. Алмагүл Шымырова бірнеше рет полиция шақырғанымен, тәртіп бұзушы қайта оралып, бәрі қайталанатын болған.

Жақындарының сөзінше, күдікті тек төрт күн өткен соң ғана ұсталған. Қанды оқиғаға үш жасар қызы куә болған. Бүлдіршінді анасының мәйітінің жанында ұйықтап жатқан жерінен тапқан.

«Үлкен немеремнің шок болғаны соншалық, анасына жақындай алмады. Ол небәрі 16 жаста. Көзқарасы меңірейіп қалған еді. Ал кішкентай қыз алғашында мүлде сөйлемеді. Кейін: «Әкем анамды пышақпен ұрды» деді. Оның қалай болғанын көрсетіп берді. Полицейлерге де бәрін айтып берді. «Әкем анамды ұрды, анам айқайлады. Мен жыладым. Мен қатты жылай бастағанда әкем қашып кетті» деді. Біз суреттерін көрдік. Денесінде алдынан да, артынан да салынған 28 пышақ жарақаты болды. Ол еш аяусыз пышақтаған. Арқасында сау жер қалмаған. Тіпті тамағын да кесіп жіберген»,  деді марқұмның анасы Фатима Шымырова.

Атырау облыстық полиция департаментінің мәліметінше, аталған факт бойынша қылмыстық іс қозғалды. Күдікті уақытша ұстау изоляторына қамалды.

Марқұмның туыстары қыздарды өз қамқорлығына алмақ. Олардың айтуынша, ең алдымен үш жасар бүлдіршін мен 16 жастағы әпкесіне психологиялық көмек көрсетуге басымдық беріледі.

Оқи отырыңыз:

• Көктал ауылы көмек сұрауда: Тұрғындар мектепсіз, көпірсіз, ауруханасыз өмір сүріп жатыр
• Қазақ киносының көрнекті тұлғасы – Ардақ Әмірқұлов дүниеден өтті