Әншілерді «шайтанның жаршысы» деген тойдағы қонаққа қылмыстық іс қозғалды

Жетісайдағы тойда айтылған сөзінен кейін Түркістан облысының 66 жастағы тұрғынына қатысты қылмыстық іс қозғалды. Оның мәлімдемелерінен діни және әлеуметтік алауыздықты қоздыру белгілері байқалған, деп хабарлайды Orda.kz.

Әлеуметтік желілерде кең таралған видеода ер адам «дұрыс» тойлар тек ішімдіксіз ғана емес, музыкасыз және өнерпаздарсыз өтуі керек екенін айтқан. Сондай-ақ ерлер мен әйелдерді бөлек отырғызу қажет екенін нұсқаған еді.

«Әншілер маған ренжімесін. Шариғатта оларды «шайтанның жаршылары» деп атайды» деген болатын той қонағы. 

Ол бұдан бөлек әйелдерді  «ұрғашылар» деп атап, қазақы ұғымға келмейтін қорлайтын сөздер де айтқан.

Аталған видеоны полиция әлеуметтік желілерді мониторингтеу барысында анықтаған. Қылмыстық іс Қазақстан Республикасы Қылмыстық кодексінің 174-бабы бойынша тіркелді.

«Адамның қадір-қасиетін қорлауға, діни, әлеуметтік немесе өзге белгілері бойынша кемсітуге бағытталған кез келген жария үндеулерге жол берілмейді»,  деп атап өтті құзырлы орган.

Бұл даулы видеоға Қазақстан мұсылмандары діни басқармасы да пікір білдірді. Онда діни тақырыпта көпшілік алдында сөйлеу үлкен жауапкершілікті талап ететіні айтылды.

Муфтияттың түсіндіруінше, ислам барлық музыканы бірдей тыйым салмайды. Ғалымдардың пікірінше, ата-анаға құрметті, Отанға сүйіспеншілікті насихаттайтын, ізгілікке шақырып, рухани және ұлттық құндылықтарды дәріптейтін шығармаларға рұқсат етіледі.

Сондай-ақ ҚМДБ өнер өкілдерін көпшілік алдында қорлау мен әйелдерді кемсітуге жол берілмейтінін атап өтті. Қазақстандықтарды сөзге жауапкершілікпен қарап, діни білімді тек сенімді дереккөздерден алуға шақырды.

Еске салсақ, бұл дау  Роза Әлқожаның әлеуметтік желідегі жазбасынан басталды. Әнші Роза Әлқожа мен басқа да өнер өкілдеріне қатысты айтылған пікір қоғамда қызу талқыға түсті. Ол тойдағы адамның сөздері  жеке басқа тіл тигізу, қорлау және буллинг екенін айтып, Жетісай әкімдігі ішкі саясат бөлімі мен Дін істері басқармасынан бұл мәселеге назар аударып, тиісті баға беруді сұраған болатын.

Бұл жағдайға президент әкімшілігі басшысының бірінші орынбасары Ерлан Қарин де пікір білдірді. Ол Қазақстан зайырлы мемлекет екенін, ел заңдары діни шектеулерден жоғары тұратынын еске салды.

Тақырыпқа қатысты ұсынамыз:

• Музыканың бәрі харам емес: ҚМДБ «пәтуа айтқыш уағызшылардың» сөзін жоққа шығарды
• Роза Әлқожа әншілерді «шайтанның азаншысы» деген қонақтың сөзіне шамданды
• Қарин өнер өкілдерін қорғап, әншілерді «шайтанның жаршылары» деген ер адамды айыптады