Роза Әлқожа әншілерді «шайтанның азаншысы» деген қонақтың сөзіне шамданды

Соңғы уақытта қоғамда дін мен дәстүрдің арақатынасы жиі талқыланып жүр. Әсіресе, кейбір діни көзқарастардың ұлттық құндылықтармен қабыспай жатуы халық арасында алаңдаушылық туғызуда, деп хабарлайды Orda.kz.        

Осындай жағдайлардың бірі жуырда Жетісай өңірінде болды деп, әнші Роза Әлқожа әлеуметтік желідегі парақшасында пікір білдіріпті.

Белгілі әнші Роза Әлқожа мен басқа да өнер өкілдеріне қатысты айтылған пікір қоғамда қызу талқыға түсті.

Жетісай қаласында өткен тойлардың бірінде келіннің туысы сөз сөйлеп, көпшілік жиындардағы музыка туралы айтып, ерлер мен әйелдердің бірге отыруына қарсылық білдіріпті. Ол тойда музыка  ойналмауы тиіс екенін айтып, әншілерді шариғатта «шайтанның азаншысы» деп атайтынын айтқан. Сонымен қатар, ол асабаға алдағы уақытта осы жайттарды ескеруді ұсынған.

Бұл жиынға қонақ ретінде қатысқан әнші Роза Әлқожа оқиғаның видеосын желідегі парақшасында жариялады. Өнер иесі ер адамның пікірінен теріс діни ағымның сарыны байқалуы мүмкін екенін айтып, алаңдаушылық білдірді.

«Той иесі алтын құрсақты ана болсын деп ырым етіп, келін сәлем жасатқан. Біз де арнайы бардық сол үшін. Бірақ, құдалар тойға келмепті. Келін былайша сәлем салмайды екен. Ал мынау нағашылар жағынан шыққан ақсақал-сымақтың сөзі. Ханафи мәзхабымен жүрген аңқау елге арамза молда қайдан шыққан? Мені қойшы, тұтас музыканы харам деп тұрғаны қалай кетті? Ақшасын берді деп айыптағанға үндемей кете береміз бе?» деп жазды әнші.

Ол Жетісай әкімдігі ішкі саясат бөлімі мен Дін істері басқармасынан бұл мәселеге назар аударып, тиісті баға беруді сұрады.

«Маған жасаған буллинг үшін жауап бола ма? Жеке басқа тиісу, қорлау бойынша қандай бап бар? Заңгерлер болса жаза отырыңыздар!» деп қосты Роза Әлқожа. 

Әншінің ойынша жеке басқа тіл тигізу, қорлау және буллинг. Қоғамда әр адам өз пікірін айтуға құқылы болғанымен, бұл өзгені кемсітуге немесе ар-намысына тиюге негіз болмауы тиіс.

Біз кеше ғана мешітке келген жасөспірімдердің бірінің мұрнын сындырып, екіншісінің миын шайқаған адам сотталғанын жаздық. Ақтөбе қаласындағы бас мешітте жасөспірімдерге күш қолданған оқиға қоғамда үлкен резонанс тудырды. Сот үкімімен айыпталушы Бауыржан Оралов 1 жыл 6 айға бас бостандығынан айырылды.

Қазақ қоғамы әрдайым кеңпейілділік пен сабырлылықты жоғары қойған. Сондықтан да кез келген пікір айтқанда, оның салдары мен әсерін ескерген жөн.

• Сөзіне «берік» Трамп Иранды «екіжүзді» деп айыптады
• Мешітке келген жасөспірімдердің бірінің мұрнын сындырып, екіншісінің миын шайқаған адам сотталды