Министрлік мәліметі: Жалған дипломды қалай ажыратамыз?

Қазақстанда 46 жалған диплом және оларды дайындауды ұсынған 20 интернет-алаң анықталды, деп хабарлайды Orda.kz. 

Ғылым министрлігі жалған дипломдар туралы мәлімдеп,  құжаттың түпнұсқалығын қалай тексеруге болатынын түсіндірді.

Қазіргі таңда 1991 жылдан бері берілген қазақстандық жоғары оқу орындарының барлық дипломдары бірыңғай деректер базасына енгізілген.

Жаңа үлгідегі дипломдар арнайы жүйе арқылы рәсімделеді. Бұл жүйе әр құжатқа автоматты түрде бірегей нөмір мен QR-код береді.

Егер дипломда осы деректер болмаса, ол жарамсыз болып саналады.

«Жүйеге тек осы модульде тіркелген жоғары оқу орындарының жауапты қызметкерлері ғана қол жеткізе алады. Дипломдарды қалыптастыру «Жоғары білімнің бірыңғай платформасы» (ЖББП) ақпараттық жүйесіндегі студенттер туралы деректер негізінде жүзеге асырылады. Егер студент туралы мәлімет ЖББП-да болмаса, диплом нөмірін қалыптастыру мүмкін емес» деп жазылған хабарламада. 

Дипломның түпнұсқалығын epvo.kz сервисі арқылы тексеруге болады. Сонымен қатар оның электронды нұсқасы eGov қосымшасындағы «Цифрлық құжаттар» бөлімінде қолжетімді.

Былтыр Алматы қаласында мұғалім 18 жыл бойы жалған дипломмен жұмыс істегені анықталды. Александра Сидельникова 18 жыл бойы №116 мектепте оқушыларға сабақ беріп, халық есебінен жалақы алып отырған. Тексеру барысында оның педагогикалық білімі жоқ екені белгілі болып, жұмыстан шығарылды.

Бұған дейін Арман Әшімов халықаралық дәрежедегі спорт шебері және жаттықтырушы атақтарын заңсыз алған бірнеше адамның есімдерін атағаннан кейін тексеріс жүргізілген болатын.

Тақырыпқа қатысты оқи отырыңыз:

• Жалған диплом пайдаланған 260 жаттықтырушы атақтарынан айырылды
• Алматыда жалған дипломмен 18 жыл жұмыс істеген мұғалім жұмыстан босатылды
• Жамбыл облысында бір жыл бойы жалған дипломмен балаларды оқытты