Шетелдегі сталкинг: Қазақстан тумасы Түркияда пышақталған

Солтүстік Кипрдің (Қазақстан мойындамаған) Никосия қаласындағы супермаркеттердің бірінде Қазақстан тумасы, қырғызстандық 22 жастағы Жанерке Әбдіразақоваға пышақпен шабуыл жасалды, деп хабарлайды Orda.kz.        

Қазақстан Республикасы Сыртқы істер министрлігі Солтүстік Кипрде болған оқиғада зардап шеккен тұлғаға қатысты пікір білдірді.

«Мәліметтерді нақтылау барысында зардап шеккен азаматтың Қазақстанда туғаны, алайда оның Қырғыз Республикасының азаматы екені анықталды. Қазақстан Сыртқы істер министрлігі бұл оқиғаны тікелей бақылауына алды» деп жазылған хабарламада.

Жергілікті БАҚ ақпаратынша, күдікті – 31 жастағы Түркия азаматы, бойжеткеннің бұрынғы жігіті. Ол Стамбұлдан келіп, қызды төрт күн бойы аңдыған. Содан соң супермаркетте оны аяусыз пышақтап, артынша өзін де жарақаттаған.

Қазір күдіктінің жағдайы тұрақты, өміріне қауіп төніп тұрған жоқ. Ал Жанеркенің жағдайы өте ауыр, ол жансақтау бөлімінде жатыр. Дәрігерлер ішкі қан кетуді тоқтату үшін күресіп жатыр. Бауыры зақымдалғандықтан оған екінші ота қажет болуы мүмкін. 

Қазіргі таңда қазақстандық дипломаттар жергілікті құзырлы органдармен тұрақты байланыс орнатып, оқиғаның мән-жайын толық анықтап жатыр.

Оқи отырыңыз:

• Музыканың бәрі харам емес: ҚМДБ «пәтуа айтқыш уағызшылардың» сөзін жоққа шығарды
• «Қарғысты қайтарамыз»: Қарағандылық зейнеткер алаяқтарға 15 млн теңгесін өз қолымен ұстатқан