Музыканың бәрі харам емес: ҚМДБ «пәтуа айтқыш уағызшылардың» сөзін жоққа шығарды

Қазақстан мұсылмандары діни басқармасы Жетісайдағы отбасылық тойда айтылған уағызға қатысты пікір білдірді. Онда бір ер адам «әншілер – шайтанның жаршылары» деп мәлімдеп, қоғамда бұрыннан бар «музыкаға исламда тыйым салынған» деген түсінікті қайталаған, деп хабарлайды Orda.kz.       

Бұл сөздер қоғамда үлкен сынға ұшырап, тіпті бұл жағдайға президент әкімшілігі басшысының бірінші орынбасары Ерлан Қарин де пікір білдірді. Қарин тойда тілекке шығып, ерсі уағыз айтып кеткен ер адамның видеосын желіден көріп қалғанын, шын мәнінде, оның әйелдерді кемсітуі, әншілерге, музыка өнеріне қатысты теріс пікір білдіруі болмысымызға мүлдем жат екенін жазды. 

Муфтияттың түсіндіруінше, исламда арсыздыққа, азғындыққа және шариғатта тыйым салынған әрекеттерге шақыратын әндер құпталмайды. Ал діни және ұлттық құндылықтарды дәріптейтін, Отанға деген сүйіспеншілікті, ата-анаға құрметті, адамгершілік пен ізгі амалдарды насихаттайтын шығармаларға рұқсат етіледі.

Сондай-ақ ҚМДБ ислам діні адамдарды даналықпен насихаттауға, айналадағыларды қорламауға және әр адамның ар-намысы мен қадір-қасиетін құрметтеуге шақыратынын еске салды.

Осыған байланысты өнер иелеріне жаппай айып тағу және әйелдерге қатысты қорлайтын сөздер айту — қабылданбайтын әрекет екені атап өтілді.

Еске салсақ, бұл дау  Роза Әлқожаның әлеуметтік желідегі жазбасынан басталды. Әнші Роза Әлқожа мен басқа да өнер өкілдеріне қатысты айтылған пікір қоғамда қызу талқыға түсті. Ол тойдағы адамның сөздері  жеке басқа тіл тигізу, қорлау және буллинг екенін айтып, Жетісай әкімдігі ішкі саясат бөлімі мен Дін істері басқармасынан бұл мәселеге назар аударып, тиісті баға беруді сұраған болатын.

Оқи отырыңыз:

• Қарин өнер өкілдерін қорғап, әншілерді «шайтанның жаршылары» деген ер адамды айыптады
• Роза Әлқожа әншілерді «шайтанның азаншысы» деген қонақтың сөзіне шамданды