Тоғыз тонналық титан құймасын ұрлады деген күдікті 10 жылдан кейін Алматыда ұсталды

Алматыда 63 жастағы ер адам ұсталды. Ол 10 жыл бойы салмағы 9 тоннадан асатын титан құймасын ұрлау ісі бойынша іздеуде болған, деп хабарлайды Orda.kz.

ШҚО ПД мәліметінше, қылмыс 2015 жылы Өскемендегі кәсіпорындардың бірінде жасалған. Бірнеше қызметкер күзетшілермен келісіп, салмағы 9 370 келі болатын құйманы аумақтан алып шыққан. Оны жасыру үшін металл көліктің үстіне салынып, оны матамен жауып, қоқыспен бүркелген. Кейін құйма қайта сатылған. Оның құны 31 млн теңгеден асатын болған.

Тергеу барысында полиция қылмысқа қатысы бар барлық тұлғаларды анықтап, ұрланған металды қайтарды. Сол кезде күдіктілердің басым бөлігі жауапқа тартылғанымен, бір адам қашып кеткен екен. Ол халықаралық іздеуге жарияланған.

Полиция хабарлауынша, іздестіру жұмыстары жылдар бойы тоқтамаған. Ақыры 10 жылдан кейін күдікті Алматыдан табылды.

Қазір ол уақытша ұстау изоляторына қамалды. Іс бойынша соңғы шешімді тергеу органдары қабылдайды.

Оқи отырыңыз:

• Отырарда Алтын Орда дәуіріне тиесілі ең көне мешіт табылды
• Сөзіне «берік» Трамп Иранды «екіжүзді» деп айыптады