Елге шетелден көлік әкелуге тыйым салына ма?

Қазақстанда «сұр импорт» арқылы әкелінетін автокөліктерге қарсы күрес күшейтіледі. Алайда азаматтардың шетелден көлікті өз бетінше сатып алу құқығы шектелмейді, деп хабарлайды Orda.kz.

Бұл туралы Сауда және интеграция министрі Арман Шаққалиев мәлімдеді. Министрдің айтуынша, Үкіметтің басты мақсаты — жол қауіпсіздігін арттыру және талаптарға сай келмейтін көліктердің елге әкелінуіне жол бермеу.

«Қазақстанға автоқоқыс келмеуі тиіс. Бірақ біз адамдардың көлік таңдау құқығын шектегіміз келмейді. Біз талаптарды Еуразиялық экономикалық одақ ережелеріне сәйкестендіріп жатырмыз, көліктерді сынау процесіне бақылауды күшейтеміз және толық тексерусіз құжат беретін зертханалардың жұмысын тоқтатамыз. Қазірдің өзінде осындай жеті зертхана жабылды», — деді Шаққалиев. 

Оның сөзінше, мемлекет бәсекелестікпен емес, заңсыз әкелу схемаларымен күресіп жатыр. Себебі «сұр» дилерлер көбіне VIN-кодтары өзгертілген, ауыр жол апаттарынан кейінгі және қауіпсіздік кепілдігі жоқ көліктерді сатады.

Оқи отырыңыз:

• Шетелдік жүргізушілер енді жазадан құтыла алмайды
• Қазақстанға шетелден қанша көлік келді?
• Шетелдік тасымалдаушылар Қазақстанның салық заңнамасын сақтауы тиіс