«Қарғысты қайтарамыз»: Қарағандылық зейнеткер алаяқтарға 15 млн теңгесін өз қолымен ұстатқан

Қарағандыда үш бейтаныс әйел 78 жастағы зейнеткерге «дуа жасалғанын» айтып, 15 миллион теңгесін қағып алғаны аздай, мазақ қылғандай қолына «қарғысты қайтаратын» таза қағаз ұстатып кеткен, деп хабарлайды Orda.kz.       

Кейуанадан тіс дәрігеріне қалай баруға жол сұраған үш келіншек зейнеткердің бар жиған-тергенін үптеп кеткен. Әңгіме барысында олардың бірі әжейге бұрыннан сіңіп қалған «қарғыс барын» айтқан. Алаяқтар зейнеткерді қорқытып, бұл «қарғыстың» кесірінен жақындарының бірі қайтыс болуы мүмкін екенін жеткізген. Бұл туралы ҚР ІІМ хабарлады.

«Қарғысты қайтару» үшін олар оны шикі жұмыртқаға көшіру керек екенін айтқан. Қорқып кеткен әйел үйінен жұмыртқа әкеліп береді. Кейін бейтаныс адамдар одан алтын әшекейлерін шешіп, ақшасын алып, барлығын газетке орап беруді сұраған.

Осыдан кейін олар зейнеткерге мөрленген түйіншек беріп, оны 40 күннен кейін ғана ашуды, ішіндегісін өртеп, күлін сол жерге алып келуді тапсырған. Алайда түнде әйел түйіншекті тексермекші болғанда, ішінен тек ештеңе жазылмаған ақ қағаз шыққан.

Жалпы құны 15 млн теңге болатын ақша мен әшекейлер үш келіншектің қолында кеткен.

Зейнеткер күдіктілердің сыртқы келбетін полицияға толық сипаттап берген. Жедел қызметкерлер олардың Павлодар, Алматы және Жетісу облысының тұрғындары болуы мүмкін екенін анықтаған. Алдын ала мәлімет бойынша, бұл әйелдер осыған ұқсас басқа да қылмыстарға қатысы болуы ықтимал.

Жәбірленушінің берген нақты сипаттамаларының арқасында Қарағанды облысы полиция департаменті криминалдық полиция қызметкерлері күдіктілердің ізіне түсіп, қолға түсірген. Тергеу барысында олардың Павлодар және Алматы қалаларының, сондай-ақ Жетісу облысының тұрғындары екені және осыған ұқсас алаяқтық әрекеттерге бұрын да қатысы болуы мүмкін екені анықталды.

Қазіргі уақытта аталған дерек бойынша қажетті тергеу амалдары жүргізіліп жатыр. Күдікті әйелдер ұсталды.

Оқи отырыңыз:

• Саида Мирзиёева президент әкімшілігінің «қызметкер» мысықтарын көрсетті
• Роза Әлқожа әншілерді «шайтанның азаншысы» деген қонақтың сөзіне шамданды