Қаскелеңде 11 жастағы баланы талап тастаған иттердің иесіне қатысты сот басталды

Өткен жылдың жазында 11 жастағы балаға шабуыл жасап, ауыр жарақат салған иттердің иесіне қатысты сот процесі басталды, деп хабарлайды Orda.kz. 

Прокуратураның нұсқасы бойынша, айыпталушы өзінің иттері қауіпті екенін білген. Алайда ол ауланы дұрыс қоршамаған әрі жануарларды тиісті деңгейде бақыламаған. Соның салдарынан бала басынан, бетінен және денесінің басқа жерлерінен ауыр жарақат алған. Иттерді кездейсоқ өтіп бара жатқан азамат тоқтатып, олардың екеуін пышақтап өлтірген.

Жәбірленуші баланың анасы оқиғадан кейін ұлының өмірі түбегейлі өзгергенін айтты.

«Маған қоңырау шалып, иттердің ұлымды талап тастағанын айтты. Жүгіріп барғанда қан-жоса болған баламды көрдім. Содан кейін Максим тұйықталып кетті, денесіндегі тыртықтарынан ұялады. Оған тағы бір пластикалық ота қажет», — деді Екатерина Бурмистрова. 

Ал төбелесетін иттердің иесі өз кінәсін мойындамайды. Оның айтуынша, балалар иттерді өздері арандатқан. Сондай-ақ ол күшіктердің балаға мұндай ауыр жарақат салуы мүмкін емес екенін алға тартты.

Жәбірленуші ит иесінен шамамен 4,5 миллион теңге материалдық шығынды және 10 миллион теңге моральдық өтемақыны өндіріп беруді талап етіп отыр.

Айыпталушыға қатысты елден шықпау туралы қолхат түріндегі бұлтартпау шарасы қолданылған. Ол абайсызда адам денсаулығына ауыр зиян келтіру бабы бойынша сот алдында жауап беріп жатыр.

Оқи отырыңыз:

• Көктал ауылы көмек сұрауда: Тұрғындар мектепсіз, көпірсіз, ауруханасыз өмір сүріп жатыр
• АҚШ бақылаудан шыққан ЖИ-ді шұғыл өшіретін заң дайындап жатыр