Орал ежелден орыстың қаласы - шулы мәлімдемеден кейін тергеу басталды 

Оралдың екі тұрғынының сепаратистік мәлімдемесі бойынша полиция тергеу бастады, деп хабарлайды «Уральская неделя» басылымы.

«Жүргізілген шаралар нәтижесінде 1990 жылы туған азамат «Р» және 1987 жылы туған азамат «К» анықталды. Екеуі де Орал қаласының тұрғындары. 2023 жылдың 14 ақпанында аталған факті бойынша Қазақстан Республикасы Қылмыстық кодексінің 174-бабының 1-бөлігі «Ұлтаралық араздықты қоздыру» бойынша сотқа дейінгі тергеу басталды. Қазақстан Республикасы Қылмыстық-процестік кодексінің 201-бабы шеңберінде өзге мәліметтер жария етуге жатпайды» деп мәлімдеді БҚО полиция департаменті.

Күдіктілер мен блогер арасындағы диалог чат-рулетка ғаламтор желісінде орын алған. Ер адам Оралдың ежелден орыс қаласы екенін айтып, қазақ тілді қазақтарды «мәмбет» деп атап, Ресей Қазақстанға шабуыл жасаса, орыстарды қолдайтынын айтқан.

Ұсталғаннан кейін ол қазақстандықтардан кешірім сұрап, блогермен мас кезінде сөйлескенін алға тартқан.