Елімізде 70 жыл бұрын жойылып кеткен жолбарыс табиғат аясына жіберілді

«Іле-Балқаш» резерваты аумағында Үміт атты амур жолбарысының ұрғашысы жабайы табиғатқа жіберілді. Бұл – осы жыртқыштар жойылып кеткеннен кейін 70 жылдан астам уақыт өткен соң Қазақстанның табиғи ортасына оралған алғашқы жолбарыс, деп хабарлайды Orda.kz.

Жолбарысты табиғатқа жіберу оны тарихи мекеніне қайтару бағдарламасының алғашқы нақты кезеңі. Оңтүстік Балқаш өңірі мен Іле өзенінің аңғары кездейсоқ таңдалмаған. Бұрын бұл аумақта Тұран жолбарысы мекендеген. Алайда ол тоғайлы ормандардың азайып, ол қоректенетін жабайы тұяқты жануарлар санының кеміп, браконьерліктің өсуі салдарынан жойылып кеткен.

Экология министрлігінің мәліметінше, жолбарысты қайта жерсіндіруге дайындық он жылдан астам уақытқа созылған. Осы кезеңде өңірде резерват құрылып, жемтік қоры қалпына келтірілді, бейімдеу вольерлері салынды және тұрақты ғылыми бақылау жүйесі жолға қойылды.

2026 жылдың мамыр айында Қазақстанға төрт амур жолбарысы, яғни екі ересегі мен екі күшігі жеткізілді. Табиғатқа жіберілер алдында Үміт ветеринарлық тексеруден және мінез-құлық сынақтарынан өтті. Мамандар оның денсаулығын, аңшылық қабілетін және өз бетінше өмір сүруге дайындығын бағалады.

Жолбарысқа спутниктік GPS/GSM мойынбауы тағылды. Қазір оның қозғалысы тәулік бойы спутниктік деректер мен фототұзақтар арқылы бақылауда.

Аталық жолбарыс әзірге бақылауда қалып отыр. Оны табиғатқа жіберу туралы шешім барлық сынақтар аяқталғаннан кейін қабылданады. Ал екі күшігі кемінде бір жарым жасқа дейін қамқорлықта болады.

Бағдарламаның түпкі мақсаты — Іле өзенінің атырабы мен Оңтүстік Балқаш өңірінде жолбарыстардың тұрақты популяциясын қалыптастыру.

Оқи отырыңыз:

• Қазақстандықтардың депозиттен түсетін табысы азаяды
• ОСК Құрылтай депутаттарын сайлауға арналған бюллетенді көрсетті