Қырғызстан мен Өзбекстан аумақ алмасу үдерісін ресми түрде бастады

Қырғызстан мен Өзбекстан Бұхараға қарасты болған Чоң-Қара және Таш-Төбе ауылдарын Бішкекке ресми түрде беру бойынша ұйымдастырушылық-техникалық жұмыстарды бастады. Ал Ташкентке көлемі жағынан осыған тең келетін жер телімдері берілді, деп хабарлайды Orda.kz 24.kg-ге сілтеп.

Бұл туралы Баткен облысындағы президент өкілдігі мәлімдеді. Жұмыстар Қырғызстан-Өзбекстан мемлекеттік шекарасын демаркациялау және жер учаскелерімен алмасу жөніндегі келісімдер аясында жүргізілуде.

Екі елдің бірлескен жұмыс комиссиясының алғашқы отырысы 24 шілдеде Қадамжай ауданында өтті. Тараптар берілетін аумақ тұрғындарының азаматтық мәртебесін, көшіру мәселелерін, мүлік пен шаруашылық қызметке қатысты сұрақтарды және басқа да ұйымдастырушылық мәселелерді талқылады.

3 тамыздан бастап бірлескен жұмыс тобы тікелей ауылдарда жұмысын бастады. Мамандар тұрғындарды тіркеуден өткізіп, құжаттарды рәсімдеудің алдағы тәртібін түсіндіруде.

Чоң-Қара және Таш-Төбе ауылдарында негізінен этникалық қырғыздар тұрады. Алдын ала мәлімет бойынша, екі ауылдың халқы шамамен 2,5 мың адам.

Тіркеу аяқталғаннан кейін тұрғындарға Қырғызстан азаматтығын беру бойынша заңда қарастырылған рәсім басталады.

Өз кезегінде Қырғызстан Өзбекстанға жалпы аумағы 236 гектар болатын тең құнды жер учаскелерін береді. Бұл жерлер Сай — Таян автожолын салуға пайдаланылмақ.

Сонымен қатар Қырғызстан Тәжікстанмен де аумақ алмасу жоспарлап отыр.

Бұған дейін Қырғызстан президентінің баспасөз хатшысы Қазақстанмен де тең құнды жер учаскелерімен алмасу мүмкіндігі туралы мәлімдеген болатын. Әңгіме Тоқмок қаласы маңындағы ұзындығы шамамен 800 метр жер телімі туралы болып отыр. Қырғыз тарапының айтуынша, бұл аумақ ақылы автожол салу үшін қажет.

Оқи отырыңыз:

• Интернет кеңістікті боғауыз «треш-стримерлерден» тазарту жалғасады
• 24 елдегі 131 университет: Қос дипломдық бағдарламаның көкжиегі кеңи түсті