Белгілі ғалым Орал Ақшолақов қайтыс болды

Мұнай-газ саласында қызмет атқарған қазақ ғалымы, қазақ геологиялық барлауының негізін салушылардың бірі, қазіргі Энергетика министрі Болат Ақшолақовтың әкесі Орал Ақшолақов қайтыс болды. Ақпаратты Энергетика министрлігінің баспасөз қызметі растады.

Орал Ақшолақов 170-тен астам жарияланған және қолжазба ғылыми еңбектердің, сондай-ақ Қазақстан мұнай энциклопедиясының екі басылымының авторы. Ол1976 жылы «Каспий ойпатының оңтүстік бөлігіндегі мұнай-газ кен орындарының геологиялық құрылымы мен орналасуының ерекшеліктері» тақырыбында кандидаттық диссертациясын қорғады.

Еңбек жолын 1958 жылы Батыс Қазақстан геологиялық басқармасы мен Гурьев кешенді аумақтық мұнай және газ барлау экспедициясының коллекторы болып бастады. Бірнеше жыл геологиялық экспедицияларда жұмыс істеді.

1992-1994 жылдары - Қазақстан Геология және жер қойнауын қорғау министрлігінің бас мұнай-газ басқармасының бастығы қызметін атқарды.

1994 жылдан 1998 жылға дейін «ҚазМемлекеттік» РМК минералдық ресурстар бас басқармасы бастығының орынбасары болды.

Одан кейін бірнеше жыл «Степной Леопард» бірлескен кәсіпорнының бас директоры, «Тау-кен және экономикалық консалтинг» ЖШС бас маманы қызметтерін атқарды.

2003 жылдан бастап Марабаев атындағы «Мұнайшы» қоғамдық қорының құрылтайшысы және Қамқоршылық кеңесінің мүшесі болды.