Bek Air ісі: ААК қызметкерлері әрекетсіздіктері үші айыпталды

Сыбайлас жемқорлыққа қарсы іс-қимыл департаменті Азаматтық авиация комитеті қызметкерлерінің әрекетсіздігі бойынша қылмыстық істі тергеп жатыр.

Аталған факті бойынша ҚР Қылмыстық кодексінің 370-бабының 4-бөлігінің 1-тармағы «Қызметтегі әрекетсіздік» бойынша қылмыстық іс қозғалғаны хабарланды. 2018 жылы ААК қызметкерлері Алматы аэродромына ұшуға жарамдылық сертификатын заңсыз берген – бұл Fokker-100 ұшағының апатқа ұшырауына әкелді.

Әуежайда анықталған бұзушылықтарды жою шартымен 2023 жылдың 20 сәуіріне дейін әуеайлақтың ұшуға жарамдылық сертификаты болды.

Бас прокурор Берік Асылов депутаттық сауалға берген жауабында Алматы әуежайы аэродромының маңында 23 тұрғын үй бар екенін, олар заң бұзушылықтарды жоюға мүмкіндік бермей отырғанын айтты.

Шенеуніктердің әрекетіне түпкілікті баға тергеу нәтижелері бойынша беріледі, деп қосты Бас прокурор.

2019 жылдың 27 желтоқсанында Алматы әуежайының маңында Bek Air әуе компаниясының ұшағы апатқа ұшырады. Бортта 93 жолаушы мен бес экипаж мүшесі болған, 12 адам қаза тапқан.

Ұшақ апатынан кейін Қазақстанның авиациялық әкімшілігі Бас көлік прокуратурасымен бірлесіп Bek Air әуе компаниясының қызметіне жоспардан тыс тексеру жүргізді. Оның қорытындысы бойынша ұшу қауіпсіздігіне әсер ететін заң бұзушылықтар анықталды. «Бек Эйр» АҚ «Қазақстан Республикасының әуе кеңістігін пайдалану және авиация қызметі туралы» Заңының 12-бабының 5-тармағына, 16-9-бабының 2-тармағының 10-тармақшасына сәйкес бұзушылықтарды жою туралы нұсқамаларды орындамауына байланысты», Bek Air операторының сертификаты қайтарылып алынды.

Bek Air SA-ның барлық тоғыз Fokker ұшағының ұшуға жарамдылық сертификаттары да жойылды.