Жүрсін Ерманның ауруханадағы видеосы пайда болды

Ауруханада төсекке таңылған ақын Жүрсін Ерманның жағдайы бүкіл жұртты алаңдатып отыр.

Ақынның instagram парақшасына сілтеме жасап, Экспресс К хабарлайды.

Ғаламторда тараған бейнероликте Жүрсін Ерман аурухана төсегінде жатыр. Жанында жұбайы Бақытжамал бар. Сырқаттан әбден шаршаған азулы ақын жан-жарына жүрек тебірентерлік өлең жолдарын оқып берген.

– Жамкен-жан, осы аурудан өлем білем,

Алланың аманатын берем білем.

Кеудемнен көкала үйрек «қош» деп ұшты,

Сол шіркін, кәрі жолдас өлең білем, – деді ақын.

Бұл өлеңді естіген жұбайы бірден «Қойшы, жынды ма?» деп Жүрсін Ерманға әуелде ұрсып тастайды, кейін отағасының маңдайынан сүйіп, көзіне жас алғанын аңғаруға болады.

Сондай-ақ, Жүрсін Ерман жеке парақшасына тағы бір жүрек тебірентерлік видео жүктеген. Әлгі бейнежазбада жұбайы екеуі жақынынан айырылған жандардың өмірі туралы өлең жолдарын талқылап жатыр.

Ақынның дәл қазіргі хал-жағдайын көрген танымал өнер майталмандары жылы лебізін жазып, амандығын тілеуде.

Айта кетейік, бүгінде Жүрсін Ерман Швейцарияның Женева қаласында ем қабылдап жатыр. Ақынды аталмыш мемлекетке шетелдік құдасы Тедрос Гебреисус шақыртқан еді. Ол – Дүниежүзілік денсаулық сақтау ұйымының басшысы.