Бас прокуратура сайлауалды үгіт ережелерін бұзғандарға айыппұл салынатынын ескертті

Бас прокуратура сайлауалды үгіт қарсаңында БАҚ, онлайн-платформалар, кандидаттар мен өзге де сайлау процесіне қатысушыларға заң талаптарын еске салды. Ведомство үгіт жүргізу тәртібін бұзғандарға әкімшілік жауапкершілік қарастырылғанын мәлімдеді, деп хабарлайды Orda.kz.

Бас прокуратураның мәліметінше, шарттық негізде үгіт материалдарын жариялайтын БАҚ пен онлайн-платформалар үгіт басталғанға дейін кемінде бес күн бұрын Орталық сайлау комиссиясына қызмет құны мен орналастыру шарттары туралы ақпарат ұсынуы тиіс. Үгіт материалдарын ОСК бұл мәліметтерді жариялағаннан кейін ғана орналастыруға болады. Бұл талапты бұзғандарға 30-дан 50 АЕК-ке дейін айыппұл қарастырылған.

Сондай-ақ, кандидаттарға сайлаушылармен кездесуге арналған үй-жайлар барлығына бірдей және тең шарттармен берілуі қажет. Бұл талап сақталмаса, 30 АЕК көлемінде айыппұл салынады.

Ведомство үгіт материалдарында оларды шығарған ұйым, тапсырыс беруші және қаржыландыру көзі туралы ақпарат көрсетілуі міндетті екенін еске салды. Ал шетелде дайындалған, анонимді немесе осы сайлау науқанына арналмаған үгіт материалдарын пайдалануға тыйым салынған. Мұндай заң бұзушылық үшін 25 АЕК айыппұл көзделген.

Сонымен қатар, заңды түрде орналастырылған үгіт материалдарын қасақана бүлдіргендерге 15 АЕК көлемінде айыппұл салынады. Осыған байланысты Бас прокуратура сайлау процесіне қатысушыларды заң талаптарын қатаң сақтауға шақырды.

Оқи отырыңыз

Алматыда үш әйелі бар екенін жарияға жар салып жүрген ер адам жауапқа тартылды

Ұмыт болған дәстүр қайта жаңғырды ма? Күйеу баланың үш рет тәжім етуі