Яссауи іліміне қатысты XVII ғасырдың сирек қолжазбасы табылды

«Әзірет Сұлтан» ұлттық тарихи-мәдени музей-қорығы жанындағы Яссауитану ғылыми орталығының зерттеушілері Ресей мемлекеттік кітапханасы қорынан Яссауи тариқатының тарихы мен рухани мұрасына арналған, ғылыми ортада бұрын көп тарала қоймаған XVII ғасырдың құнды қолжазбасын тауып алды, деп хабарлайды Orda.kz.       

Бұл ғылыми ізденіс мемлекет басшысы Қасым-Жомарт Тоқаевтың Қожа Ахмет Яссауи мұрасын жан-жақты зерттеп, кеңінен дәріптеу жөніндегі тапсырмасы және Үкімет бекіткен Яссауитану саласын дамыту жоспары аясында жүргізілуде.

Мәскеуге жасалған ғылыми экспедиция кезінде табылған «Хужжат әз-Закирин ли-радд әл-Мункирин» («Зікірді жоққа шығарушыларға қарсы зікір айтушылардың дәлелі») атты еңбек Бұхарада жазылған. Бұл туынды Яссауи мектебінің қалыптасуы мен дамуын түсінуге мүмкіндік беретін маңызды жазба дереккөздердің бірі саналады.

Қолжазбада сопылық ілімнің негіздері, жария зікір дәстүрі және рухани сабақтастық мәселелері кеңінен қамтылған. Сонымен қатар еңбекте Қожа Ахмет Яссауиден басталып, Хакім ата мен Зеңгі ата арқылы жалғасып, тариқаттың кейінгі өкілдеріне дейін жеткен рухани шежіре туралы құнды мәліметтер берілген.

Қазіргі уақытта мамандар қолжазбаның ғылыми сипаттамасын дайындап жатыр. Алдағы кезеңде оның мәтіні белгілі нұсқалармен салыстырылып, терең мәтінтанулық талдау жүргізіледі. Зерттеу нәтижелері ғылыми айналымға енгізіледі деп күтілуде.

Оқи отырыңыз:

• Қожа Ахмет Яссауи кесенесінің күмбезіне не болды? Мәдениет министрлігі түсініктеме берді
• Түркістанда жаңа Яссауи ғылыми-зерттеу институтының капсуласы салынды
• Түркістанда ҰҚТ ауадан ақша жасап, жоқ фермаға мемлекеттен үш млрд несие алған