Венесуэланың бұрынғы президенті Мадуроға қатысты сот 2027 жылы басталады

АҚШ-та Венесуэланың бұрынғы президенті Николас Мадуро мен оның жұбайы Силия Флореске қатысты есірткі саудасы бойынша қылмыстық істің соты қашан басталатыны белгілі болды, деп хабарлайды Orda.kz.

Шетелдік БАҚ-тың мәліметінше, АҚШ-тың Нью-Йорк қаласындағы федералдық соттың судьясы Элвин Хеллерштейн Венесуэланың бұрынғы президенті Николас Мадуро мен оның жұбайы Силия Флореске қатысты қылмыстық істі қарауды 2027 жылғы 1 маусымға белгіледі.

Сот отырысының алдын ала тыңдалымы шамамен 20 минутқа созылды. Түрмеден күзетпен жеткізіген Мадуро мен Флорес өздеріне тағылған айыптарды мойындамады.

Мадуроға есірткі саудасын ұйымдастыруға сөз байласу және АҚШ-қа кокаин жеткізуге қатысы бар деген төрт ауыр қылмыстық айып тағылған. Егер кінәсі дәлелденсе, ол өмір бойына бас бостандығынан айырылуы мүмкін. Қорғаушы адвокат Барри Поллак істі тоқтатуды сұрайтынын айтты. Оның сөзінше, Мадуро мемлекет басшысы ретінде қылмыстық қудалаудан иммунитетке ие болғандықтан, бұл іс сотта қаралмауы тиіс.

Судья қорғаушы тараптың алғашқы өтініштерін 2026 жылғы 2 қыркүйекке дейін тапсыруды міндеттеп, оларды қарау бойынша тыңдауды 17 қарашаға белгіледі. Сонымен қатар қорғаушылар дәлелдемелермен танысқаннан кейін қосымша өтініштерді 2027 жылғы 11 қаңтарға дейін бере алады.

Мадуроның қорғаушылары оның 2026 жылғы 3 қаңтарда Каракаста АҚШ арнайы жасағы жүргізген операция кезінде ұсталғанының заңдылығына да күмән келтірмек. Сол түні АҚШ президенті Дональд Трамптың бұйрығымен арнайы жасақ Мадуро мен жұбайын қамауға алып, кейін Нью-Йоркке жеткізген.

АҚШ билігі Мадуроны ұзақ жылдар бойы Венесуэладағы жоғары лауазымын пайдаланып, халықаралық кокаин тасымалын ұйымдастырды деп айыптап келеді. Ал Мадуро Вашингтонды елдің мұнай қорын бақылауға алуға тырысты деп бірнеше рет мәлімдеген.

Қазіргі уақытта Венесуэланы бұрынғы вице-президент Делси Родригес басқарып отыр. Осы аралықта АҚШ Венесуэланың мұнай секторына салынған санкциялардың бір бөлігін жеңілдетіп, шетелдік компаниялар елдегі мұнай-газ жобаларын кеңейте бастады.

Оқи отырыңыз:

Николас Мадуро түрмеде отырып халқына ерекше хат жолдады

Вашингтон мен Эр-Рияд келісімі: АҚШ тағы да бұрынғы қатесін қайталап жатыр ма?