Құсбегіден қызыл кітапқа енген 35 жыртқыш құс тәркіленді

Қазақстанның «Құсбегілік» ұлттық аңшылық құрамасының мүшесінен Қызыл кітапқа енген 35 құс тәркіленді, деп хабарлайды Orda.kz.       

Қазақстанда Қызыл кітапқа енген 35 жыртқыш құсты заңсыз ұстау дерегі бойынша тергеу аяқталды. Бұл туралы Қаржылық мониторинг агенттігі (ҚМА) хабарлады.

Тергеу мәліметінше, Қарағанды қаласының тұрғыны 2017 жылдан бастап өз үйі аумағында заңсыз питомник ұйымдастырған.

«Аталған азамат «Құсбегілік» федерациясының мүшесі әрі қыран құстармен ұлттық аңшылық бойынша Қазақстан құрамасының мүшесі бола отырып, Instagram желісіндегі тақырыптық парақша арқылы жабайы табиғаттан заңсыз ауланған сирек жыртқыш құстарды жеткізушілермен байланыс орнатқан» деп жазылған агенттік хабарламасында. 

Тінту барысында құқық қорғау органдары 35 құсты анықтап, тәркіледі. Олардың қатарында ителгі, бүркіт және лашын сияқты сирек түрлер бар.

Аталған құстардың барлығы Қазақстанның Қызыл кітабына енгізілген және жойылып кету қаупі бар. Қазіргі уақытта күдікті қамауға алынды. Сондай-ақ сот шешімімен оған тиесілі Toyota 4Runner автокөлігіне де тыйым салынды.

Қазіргі кезде тәркіленген құстар Қарағанды зообағында уақытша күтіп-бағуға жіберілді. Сот үкімі заңды күшіне енгеннен кейін оларды табиғи мекен ету ортасына қайта жіберу жоспарланып отыр.

Тергеу мүддесіне байланысты өзге ақпарат жария етілмейді.

Оқи отырыңыз:

• WBO Жәнібек Әлімханұлының титулдан бас тартуын қабыл алды
• 32 ауыр жүк көлігі жолда қалды: Артық жүк артқан тасымалдаушылар жазаланды
• Мемлекет басшысы бірқатар елшіні тағайындады