Түркістанда ҰҚТ ауадан ақша жасап, жоқ фермаға мемлекеттен үш млрд несие алған

Түркістанда ұйымдасқан қылмыстық топтың 27 қатысушысы 3 миллиард теңгеден астам бюджет қаражатын жымқырғаны үшін сотталды, деп хабарлайды Orda.kz.       

Олардың әрқайсысына қылмыстағы рөліне қарай 6 жылдан 8 жылға дейін бас бостандығынан айыру жазасы тағайындалды.

Түркістан облысы бойынша Қаржылық мониторинг агенттігі департаменті 2016–2021 жылдары «КТ Яссы Несие» ЖШС басшылығы агробизнесті қолдау бағдарламасы аясында ірі қара мал сатып алуға бөлінген «Аграрлық несие корпорациясы» АҚ қаражатын жымқыру схемасын ұйымдастырғанын анықтады.

Несие алу үшін жалған тұлғалардың атына өтірік шаруа қожалықтары мен жеке кәсіпкерлер тіркелген. Олар өтінімге жалған бизнес-жоспарлар, құқық белгілейтін құжаттар және шын мәнінде жоқ кепіл мүлкі қоса ұсынған.

Несие беру саласының мамандары құжаттарды дайындап, жалған несиелік қорытынды, тексеру актілері мен қаражаттың мақсатты пайдаланылғаны туралы құжаттарды рәсімдеп, несиелердің заңды берілгендей «көрініс» жасаған.

Бағалаушылар мен кепілдік қамтамасыз ету мамандары жалған бағалау есептерін жасап, іс жүзінде жоқ немесе көрсетілген құнына сәйкес келмейтін мүліктің бар екенін растаған. Ал нотариустар ақшалай сыйақы үшін кепіл нысандарына қатысты жалған құжаттарды куәландырған.

Нәтижесінде 33 қылмыстық құқық бұзушылық фактісі анықталып, 24 жалған несие рәсімделген, кепіл ретінде 54 жоқ мүлік нысаны ұсынылған.

Сот шешімімен мемлекет кірісіне 19 тұрғын үй, 10 жер телімі, 2 пәтер, 4 коммерциялық нысан және 4 автокөлік тәркіленді.

Үкім әлі заңды күшіне енген жоқ.

Оқи отырыңыз:

• Балаева «Ахуал сегодня» YouTube-арнасы журналисінің ұсталуына қатысты пікір білдірді
• Қазақстан байланыссыз қалуы мүмкін: Үкімет жаңа спутникке он млрд бөлді
• Жол апатынан тоғыз жасар бала қаза тауып, үш адам жарақат алды