Жеңіс Нұрлыбаев джиу-джитсудан екі дүркін әлем чемпионы атанды

Джиу-джитсудан 2023 жылғы әлем чемпионаты Улан-Баторда (Моңғолия) өтуде. Жарыстың екінші күні қазақстандық Жеңіс Нұрлыбаевқа тең келер ешкім болмады, ол өзінің әлем чемпионатындағы екінші алтынын алды.

Биылғы әлем чемпионатына 41 елден 500-ден астам қатысушы келді. Үштөбелік (Алматы облысы) спортшы Жеңіс Нұрлыбаев спорттық мансабында екінші рет жарыс «алтынын» жеңіп алды. Ол алғаш рет екі жыл бұрын Абу-Дабиде (БАӘ) үздік атанды.

Ұлан-Баторда Жеңіс Нұрлыбаев (56 келі) «жекпе-жек» түрінен әлемнің ең мықты спортшысы болып танылды. Дәл осы салмақта тағы бір қазақстандық Самат Сәрсенұлы қола жүлдеге қол жеткізді.

Джиу-джитсудан әлем чемпионатының басталған күні де қоржынымызға көптеген марапаттар түсті: 5 алтын, 4 күміс, 1 қола медаль еншіледік. Русланхан Мәдіханов (69 келі), Арман Тойбағаров (77 келі), Евгений Макшанцев (+94 келі) және Рамазан Құсайыновтың (-94 келі) құрметіне Қазақстанның әнұраны шырқалды.

Тимур Сыдықов (69 келі), Дидар Бәкіжанов (84 келі) және Мұрат Бермұхаметов (94 келі), Еркебұлан Алтынбеков (+94 келі) әлем чемпионатының күміс жүлдегерлері атанды. Айбар Есенғалиев (+94 келі) қола медальмен марапатталды.

Қазақстандық күрескерлер тағы 4 жүлдені жеңіп алды: Жәнібек Әбу-Бәкір (62 келі) – «алтын», Нұрсұлтан Дүйсенқұлов (77 келі) және Әйгерім Төреғожина (48 келі) – «күміс», Аслан Қанатбеков (62 келі) – «қола».

Моңғолияда өтетін джиу-джитсудан 2023 жылғы әлем чемпионаты 21 шілдеде аяқталады.