АҚШ пен Ұлыбритания Ормуз бұғазындағы кеме қатынасын қорғау мақсатында халықаралық коалиция құрмақшы

АҚШ пен Ұлыбритания келесі аптада Лондонда жоғары деңгейдегі кездесу өткізіп, Ормуз бұғазындағы теңіз кеме қатынасын қорғауға арналған халықаралық коалиция құру мәселесін талқылауды жоспарлап отыр, деп хабарлайды Orda.kz.        

Бұл туралы  Axios басылымына еуропалық екі дипломат пен жағдайдан хабардар өзге де дереккөздер мәлімдепті.

Ақ үй өкілі де АҚШ пен Ұлыбританияның алдағы аптада осындай конференция шақыру ниеті барын растады.

Басылымның жазуынша, бұғаз арқылы коммерциялық кеме қатынасын қайта жандандыру – АҚШ-тың Иранмен қақтығыстан шығу стратегиясының және әлемдік энергетикалық нарықтарды тұрақтандыру әрекеттерінің негізгі элементтерінің бірі болып саналады.

Кездесудің нақты өтетін күні мен форматы әзірге талқылану үстінде, түпкілікті бекітілмеген. Еуропалық дипломаттардың айтуынша, жиынға Батыс елдері мен аймақ мемлекеттерінің қорғаныс министрлері және жоғары әскери басшылары қатысуы мүмкін.

Көптеген елдер ұсынған басты шарттардың бірі – халықаралық теңіз миссиясын жүзеге асыру үшін бұғаздағы әскери әрекеттерді тоқтату. Бұл құрлықтағы жағдайдың жеткілікті қауіпсіз болуын қамтамасыз етуі тиіс.

Дереккөздердің хабарлауынша, АҚШ өз одақтастарынан аймаққа қосымша ресурстар жіберуді сұрап отыр. Олардың қатарында миналарды залалсыздандыруға арналған кемелер, әскери-теңіз күштерінің кемелері және теңіз жолдарының қауіпсіздігін қамтамасыз ету үшін ұшқышсыз аппараттар бар.

Соңғы екі аптада Иран Ормуз бұғазындағы кемелерге шабуыл жасай бастағаннан кейін, АҚШ күн сайын елдің оңтүстік жағалауындағы Иранның әскери нысандарына соққы беріп келеді.

Соңғы төрт күнде сауда кемелеріне қарсы шабуылдар тіркелмеген. АҚШ Қорғаныс министрлігінің кейбір өкілдері мұны америкалық соққы нәтижесінде Иранның бұғаз маңындағы әскери әлеуеті айтарлықтай әлсірегенімен байланыстырады. Алайда басқа ресми тұлғалар Иранның әлі де бұл аймақта кемелерге шабуыл жасау мүмкіндігі бар екенін айтады.

Еске сала кетейік, бұған дейін АҚШ президенті Дональд Трамп Иран бұғаздағы кемелерге жаңа шабуыл жасаса, Тегеранды қоса алғанда көпірлер мен электр станцияларын бомбалаймын деп қорқытқан болатын. Өз кезегінде Иран АҚШ-тың одақтастары болып жүрген Парсы шығанағы елдерінің инфрақұрылымына соққы беретінін мәлімдеді.

Оқи отырыңыз:

• Қытай мен Еуроодақ арасында «сауда соғысы» басталды
• Трамп Сауд Арабиясымен ядролық келісімге келді
• АҚШ-тың жаңа кедендік баждары: Қазақстанға қатысы бар ма?