ЕО Google компаниясына 890 млн еуро айыппұл салды

Еуропалық одақ Google компаниясына цифрлық ережелерді бұзғаны үшін 890 млн еуро айыппұл салды. Еурокомиссия 2024 жылдың наурызында басталған тергеуді аяқтап, компанияны Цифрлық нарықтар туралы актінің (DMA) талаптарын бұзды деп таныды, деп хабарлайды Orda.kz Euronews-ке сілтеме жасап.

Реттеушінің мәліметінше, Google іздеу нәтижелерінде өзінің қызметтеріне — Google Shopping, Google Hotels және Google Flights — басымдық беріп, бәсекелес сервистердің көрінуін шектеген. Сонымен қатар компания қосымша әзірлеушілерге пайдаланушыларға балама төлем тәсілдері мен қосымша дүкенінен тыс тиімді ұсыныстар туралы хабарлауға кедергі келтірген.

Еурокомиссия Google-ға 60 күн ішінде анықталған заңбұзушылықтарды жоюды міндеттеді. Егер бұл талап орындалмаса, компанияға әлемдік жылдық табысының 5%-ына дейін қосымша айыппұл салынуы мүмкін.

Google бұл шешіммен келіспейтінін мәлімдеді. Компанияның жаһандық мәселелер жөніндегі президенті Кент Уокер ЕО талап етіп отырған өзгерістер сервистердің сапасын төмендетіп, еуропалық пайдаланушылар мен бизнеске кері әсер етуі мүмкін екенін айтты. Қазіргі таңда компания өзгерістерді сынақтан өткізіп жатыр, алайда айыппұлға шағым түсіре ме, жоқ па — әзірге нақтылаған жоқ.

Айта кетейік, бұған дейін Еуропалық одақ соты Google-ға салынған 4,1 млрд еуро көлеміндегі айыппұлды күшінде қалдырған болатын. Тергеу барысында компания Android операциялық жүйесінің танымалдығын пайдаланып, бәсекелестерді шектеуге тырысқаны анықталған.

Атап айтқанда, Google смартфон өндірушілеріне Google Play дүкенін пайдалану үшін Google Search іздеу жүйесі мен Chrome браузерін міндетті түрде алдын ала орнатуды талап еткен.

Бұған дейін 600-ден астам Google қызметкері корпорацияның бас директоры Сундар Пичайға үндеу жолдап, Пентагонға Google әзірлеген Gemini нейрожелісін құпия деректермен жұмыс істеу  үшін пайдалануға тыйым салуды талап етті.

Еске салсақ, елімізде президенттің тапсырмасымен елімізде жасанды интеллект университеті құрылатын болды. Ол Астанадағы EXPO аумағында орналасады. Астанадағы EXPO аумағында ашылатын жаңа жасанды интеллект университетінде оқу 2026 жылдың қыркүйегінде басталады.

Дәрежесі бойынша бакалавриат пен магистратура бағдарламаларын оқытады. Оқыту жүйесі AI+X қағидаты бойынша, яғни жасанды интеллектіні медицина, қаржы және энергетикаға енгізу.

Оқи отырыңыз:

• Google қызметкерлері жасанды интеллектті әскери мақсатта пайдалануға қарсы
• Google корпорациясы телеарналарға айыппұл төлейді
• Microsoft, Apple және Tesla: Иран АҚШ-пен байланысы бар алпауыт компаниялардың күлін көкке ұшырмақ
• Астанада жаңа AI Research University ашылады: Болашақта ЖИ үлесі арта түседі