Қазақстанның киелі нысандары ЮНЕСКО тізіміне енгізілді

Мемлекет басшысы Қасым-Жомарт Тоқаевтың бастамасы және тікелей қолдауымен Маңғыстаудың жерасты мешіттері (Бекет ата, Шопан ата, Қараман ата, Шақпақ ата, Сұлтан Үпі) ЮНЕСКО-ның Дүниежүзілік мұралар тізіміне енгізілді, деп хабарлайды Orda.kz.       

Бұл туралы Қазақстан Республикасы президенті әкімшілігі басшысының бірінші орынбасары Ерлан Қарин хабарлады.

Мұндай шешім бүгін Пусан қаласында өткен Дүниежүзілік мұра комитетінің 48-сессиясында қабылданды.

«Бұл Қазақстан тарихындағы айрықша маңызды оқиға. Соңғы рет ұлттық мәдени мұрамыздың нысаны ЮНЕСКО-ның беделді тізіміне 22 жыл бұрын енгізілген болатын (2003 жылы — Қожа Ахмет Ясауи кесенесі, 2004 жылы — Таңбалы петроглифтері). Соңғы жылдары президенттің бастамасымен бұл жұмыс қайта жанданып, сапалы жаңа деңгейге көтерілді. Атап айтқанда, 2024 жылы Атырауда өткен Ұлттық құрылтайдың үшінші отырысында Қасым-Жомарт Тоқаев Маңғыстаудың жерасты мешіттерін ЮНЕСКО-ның Дүниежүзілік мұралар тізіміне енгізу жұмыстарын бастауды тапсырған еді. ЮНЕСКО тізімінен лайықты орын алу — біз үшін зор мақтаныш. Сонымен қатар бұл тарихи жетістік бізге үлкен жауапкершілік жүктейді», — деді Ерлан Қарин. 

Ол 48-сессиядағы сөзінде Маңғыстаудың жерасты мешіттері тек құлшылық ету орны ғана емес, сол дәуірдің өзіндік білім беру және ағарту орталықтары болғанын атап өтті.

Бұл нысандар халқымыздың тарихи жады мен ата-бабалар аманатын сақтап келеді. Осылайша, ЮНЕСКО оларды ғасырлар бойы қалыптасқан рухани, мәдени және сәулеттік дәстүрлердің бірегей үлгісі ретінде мойындады.

«Тарихи нысандардың ЮНЕСКО тізіміне енуі Қазақстанға әлемдік қауымдастықтың назарын бұрынғыдан да күшейте түседі, отандық туризмнің дамуына жаңа серпін береді және инфрақұрылымдық жобаларды жүзеге асыруға мүмкіндік ашады. Бұл — ауқымды жұмыстың бастамасы ғана. Атырау, Түркістан және Қызылорда қалаларында өткен Ұлттық құрылтай отырыстарында мемлекет басшысы ұлттық номинацияларды ЮНЕСКО тізімдеріне енгізу жұмысын жан-жақты жандандыруды тапсырды. Атап айтқанда, Жаркент мешітін, толықтай ағаштан салынған Алматыдағы Вознесенск кафедралды соборын, Қаратау петроглифтерін, сондай-ақ Абайдың «Қара сөздерін» ЮНЕСКО тізіміне енгізу міндеті қойылды. Осы бағыттағы жұмыс алдағы уақытта да жалғасады», — деп түйіндеді Ерлан Қарин. 

Бұған дейін Қазақстанның ұлттық номинациясы 22 жылдан кейін алғаш рет ЮНЕСКО тізімін толықтыруы мүмкін екені хабарланған болатын.

Оқи отырыңыз:

• Тоқаев: Мәңгілік ел идеясын ту еткен Алтын Орданың тікелей мұрагеріміз
• Қазақстан ЮНЕСКО-ның Бүкіләлемдік мұра комитетіне енді
• Президент: Ұлтымыздың рухын көтеретін — домбыра!