Астанадағы нөсерден кейін көшеден 100-ден аса көлік нөмірі табылды

Төпеп жауған нөсер жаңбырдан кейін Астана көшелерінен жоғалған мемлекеттік нөмір белгілері табылып жатыр. Полицияға мемлекеттік тіркеу нөмірі белгілерін (МТНБ) жоғалтып алғандарын айтып жүздеген адам шағым түсірген, деп хабарлайды Orda.kz.       

Нөсерден кейінгі табылған нөмірлер туралы астаналықтар Threads желісінде бөлісе бастаған. Адамдар табылған нөмірлердің суреттерін жариялап, ал көлік иелері өздерінің жоғалған белгілері туралы жазып, оларды біреу тауып алған шығар деген үміт білдіруде.

Бұл жағдайға Астана қаласы Полиция департаментінің баспасөз қызметі түсініктеме берді.

«Қалада нөсерлі жауын-шашын мен жолдардың кейбір учаскелерін су басуына байланысты полицияға мемлекеттік тіркеу нөмірлік белгілерін жоғалту фактілері бойынша азаматтардан 100-ден астам өтініш түсті»,  деп хабарлады ведомство. 

Тәртіп сақшылары көлік иелері нөмір жоғалған жағдайда не істеу керектігін түсіндірді.

«Мемлекеттік нөмір белгісі жоғалған жағдайда көлік иесі дереу 102 нөмірі арқылы полицияға хабарласуы тиіс. Егер нөмір табылса, полиция қызметкерлері иесіне оны қай жерден алуға болатыны туралы хабарлайды. Егер мемлекеттік нөмір белгісін табу мүмкін болмаса, көлік иесі заңнамада белгіленген тәртіппен жаңа нөмір алу үшін мамандандырылған ХҚКО-ға жүгінуі қажет» деп жазылған хабарламада. 

Сондай-ақ жүргізушілерге өз көлігіне тиесілі емес мемлекеттік нөмір белгісін пайдалануға қатаң тыйым салынатыны да ескертілді.

Айта кетейік, бөтен немесе қолдан жасалған мемлекеттік нөмірмен көлік басқару Қазақстан Республикасының заңнамасына сәйкес әкімшілік жауапкершілікке әкеледі.

Бұдан бөлек, полиция көшеден біреудің нөмірін тауып алған тұрғындарға да үндеу жасады.

«Азаматтарды табылған мемлекеттік нөмір белгілерін өздерінде қалдырмай, жақын маңдағы полиция бөлімшесіне тапсыруға немесе 102 нөмірі арқылы хабарлауға шақырамыз. Бұл олардың заңды иелеріне қайтарылуына көмектеседі», деп мәлімдеді полиция. 

Еске сала кетейік, 23 шілдеде Астанада қатты нөсер жаңбыр жауған болатын. Біз  15 минуттық жаңбыр Астананы Венецияға айналдырғанын жаздық. Қысқа уақыт ішінде жауған қатты жауын-шашын салдарынан көшелерді су басып, кейбір жолдар шағын көлге айналды. Тұрғындар әлеуметтік желілерде суға толған көшелер мен жүріп өтуге қиын жолдардың бейнежазбаларын жаппай бөлісіп, жағдайдың күрделілігін көрсетті

Енді елордада оның салдарын жою жұмыстары жүріп жатыр.

Оқи отырыңыз:

• 15 минуттық жаңбыр Астананы Венецияға айналдырды
• АҚШ пен Сауд Арабиясы арасындағы ядролық келісім неге дауға айналды?
• Астанадағы әуетакси сынағы: Алғашқы вертипорт қайда салынады?