Әділет министрлігі NCOC-тан мәжбүрлеп өндіру шараларын бастады

Қазақстанның Әділет министрлігі North Caspian Operating Company (NCOC) филиалына қатысты 2,3 трлн теңге көлеміндегі экологиялық айыппұлды өндіріп алу үшін атқарушылық іс жүргізуді бастады, деп хабарлайды Orda.kz.       

Атқарушылық іс жүргізу органдары автоматтандырылған ақпараттық жүйесінің мәліметінше, атқарушылық құжатты Атырау облысының экология департаменті берген. Іс аймақтық әділет департаментінің сот актілерін орындау жөніндегі аумақтық бөлімінде қаралуда. Оны мемлекеттік сот орындаушысы Гүлбану Аманова жүргізіп жатыр.

Бұған дейін Әділет министрінің орынбасары Даниель Ваисов Қашаған кен орнының операторы айыппұлды 20 шілдеге дейін ерікті түрде төлеуі тиіс екенін мәлімдеген. Осы мерзім өткеннен кейін ведомство мәжбүрлеп өндіріп алу шараларына көшетінін ескерткен.

Белгіленген мерзім аяқталуға жақын кезде NCOC UNCITRAL ережелері бойынша жұмыс істейтін арбитраждық трибунал Қазақстанға халықаралық талқылау аяқталғанға дейін мәжбүрлеп өндіріп алу әрекеттерін жасауға тыйым салатын қамтамасыз ету туралы қаулы шығарғанын хабарлады.

Алайда Әділет министрлігі бұл құжат Қазақстан сотының заңды күшіне енген шешімдерін орындауға кедергі келтірмейтінін атап өтті. Ведомствоның түсіндіруінше, коммерциялық арбитраж мемлекеттің экологиялық заңнаманы қолданудағы егемен өкілеттіктерін шектей алмайды, ал мұндай қамтамасыз ету шарасы ұлттық сот тарабынан танылмайынша Қазақстан аумағында заңды күшке ие болмайды.

Көп миллиардтық айыппұл 2022 жылғы экологиялық тексеру нәтижесінде салынған. Мемлекеттік органдардың дерегіне сәйкес, Қашаған операторы 1,2 млн тоннадан астам күкіртті нормадан тыс орналастырған, сондай-ақ жеткілікті тазартылмаған ағын суларды төгу және қажетті рұқсатсыз газ жағу сияқты табиғат қорғау заңнамасының бірқатар талаптарын бұзған.

NCOC-тың бұл қорытындыларды Қазақстан соттарында даулау әрекеттері нәтиже бермей, компания барлық сот сатыларында, соның ішінде Жоғарғы сотта да жеңілген.

Қазіргі уақытта дау бір мезгілде екі халықаралық арбитражда қаралуда. Инвестициялық іс Вашингтондағы Инвестициялық дауларды реттеу жөніндегі халықаралық орталықта (ICSID) қаралып жатыр, оған консорциум мердігерлері биылғы ақпанда жүгінген.

Сонымен қатар UNCITRAL ережелері бойынша коммерциялық арбитражда жеке дау қаралуда, оның аясында уақытша қамтамасыз ету шарасы қабылданған. Соған қарамастан, Қазақстанда атқарушылық іс жүргізу басталып кетті.

Оқи отырыңыз:

• NCOC экологиялық айыппұл ретінде 12 млрд теңге төледі
• Жоба іске қосылды: Қытайлық компаниялар Қашағанда жаңа газ өңдеу зауытын салады