Түркістан облысында жол апатынан 9 адам қаза тапты

Түркістан облысында үш көліктің қатысуымен болған жол апатынан 9 адам қаза тауып, 13 адам жарақат алды.

Бұл туралы Түркістан облысы полиция департаментінің баспасөз қызметі хабарлады.

«17 шілде күні сағат 9.00 шамасында Бәйдібек аудандық полиция бөліміне Шаян ауылы маңында жол-көлік оқиғасы болғаны туралы хабарлама келіп түсті. Облыстық тас жол Екпінді-Созақ бойында Nissan, Toyota Camry және Volkswagen Grafter көліктері соқтығысқаны анықталды. Оқиға салдарынан көліктер өртенді. Ол жерде 9 адам қаза тапты, 13 адам ауруханаға жеткізілді, екі адам медициналық көмек көрсетуден бас тартты» делінген хабарламада.

Алдын ала болжам бойынша, апат Nissan көлігінің қарсы жолаққа шығып кетуі салдарынан болған.

«Қазір оқиға орнында Түркістан облысы ІІД жол полициясы басқармасы басшылығы жүр. Оқиғаның барлық мән-жайы анықталып жатыр» деп хабарлады полицейлер.

Қазір Түркістан облысы жол полициясы басқармасының басшылығы жол-көлік оқиғасы орнында жүр. Оқиғаның барлық мән-жайы анықталуда.

Аталған дерек ҚР Қылмыстық кодексінің 345-бабы «Көлiк құралдарын басқаратын адамдардың жол жүрісі немесе көлiк құралдарын пайдалану ережелерiн бұзуы» бойынша ҚР ҚК-не тіркелді.