Шымкентте полиция бейімдеу орталығына жіберген қыз үйіне қайтарылды

Шымкент қалалық полиция департаменті жоғалып, бір аптадан соң тауып қалалық кәмелет жасқа толмаған балаларды бейімдеу және оңалту орталығына өткізген 15 жасар Анел үйіне қайтарылды. 

Қала бойынша бала құқықтары жөніндегі уәкіл Жанетта Жазықбаеваның хабарлауынша, жасөспірім қыз анасына оралған. «Қыздың отбасы бақылауда болады» деді уәкіл. 

Анелдің үйіне келгенін оның анасы Orda.kz тілшісіне растады. Оның (аты-жөні жазылмайды - ред.) айтуынша, қызын қайтару үшін тиісті құжаттардың бәрін өткізген. Қазір қыздың жағдайы қиын. 

 - Не істерімді білмей отырмын. Қызым ешкіммен сөйлеспейді. Тұйық. Жанынан кетпей отырмын. Арнайы психолог жұмыс істейді деп еді. Одан да хабар жоқ. Жоғалған қызыммен бірге табылған екі жігіттің жайы не болғаны белгісіз. Прокуратураға жазған арызыма жауап берілмеді, - деді ол. 

30 желтоқсанда Шымкентте 15 жасар қыз үйінен ұрысып шығып кеткеннен бір аптадан соң табылған. Полиция қыз үйіне барудан бар тартқанын айтып оны кәмелетке толмаған балаларды бейімдеу және оңалту орталығына орналастырған. Полицияның әрекетіне қыздың анасы келіспеген. Көп өтпей іске Шымкент қаласы бойынша бала құқықтары жөніндегі уәкіл араласқан. Ол жасөспірім қызбен екі жігіттің ұсталып, босатылғанын мәлімдеген.