Ақтауда жасөспірімдер оқушыны соққыға жығып, видеоға түсірген

Жәбірленуші отбасының айтуынша, екі жасөспірім 14 жастағы баланы дүкенге шыққан кезде аңдып күтіп тұрған. Олар одан досын далаға шақырып беруді талап еткен. Бала одан бас тартқаннан кейін, оны соққыға жыққан, деп хабарлайды Orda.kz.

Оқиғаны олар жәбірленушінің өз телефонына түсіріп алған. Кейін видеоны әлгі досына жіберіп, «Сыртқа шықпасаң, сен де осындай күйге түсесің» деген хабарлама жолдаған.

Туыстарының сөзінше, телефонда алдағы «кездесу» туралы жазысқан хаттар да сақталған. Хабарламаларда кездесуге қатысады деген адамдардың аты-жөні мен кездесу уақыты — кешкі сағат тоғыз бен онның арасы көрсетілген.

Оқиғадан кейін екі жасөспірім де ата-аналарымен бірге учаскелік полиция инспекторына жеткізілген. Жақындарының айтуынша, олар өз әрекеттерін жоққа шығармаған және өздерін өктем ұстаған.

Видеода тек бір ғана соққы көрінгенімен, олардың саны бұдан көп болуы мүмкін екені жоққа шығарылмайды. Қазір мектеп оқушысы ауруханада жатыр. Оның отбасы құқық қорғау органдарынан болған оқиғаға жан-жақты тексеру жүргізіп, шабуыл жасағандардың әрекетіне құқықтық баға беруді сұрап отыр.

Оқи отырыңыз:

Атыраудағы қасірет: Үш жасар қыз анасының өліміне куә болған

Айыппұл арқалаған миссионер Дарын Мубаровтың сұхбатына құқықтық баға беріледі