Айыппұл арқалаған миссионер Дарын Мубаровтың сұхбатына құқықтық баға беріледі

Астанада тіркеусіз миссионерлік қызметі үшін бұған дейін жауапқа тартылған Дарын Мубаровтың журналист Айнұр Асанбердіге берген сұхбатына құқықтық баға беріледі. Бұл туралы Астана қаласының Дін істері жөніндегі басқармасы мәлімдеді, деп хабарлайды Orda.kz.

Ведомство мәліметінше, мониторинг барысында Айнұр Асанбердінің YouTube арнасында 2026 жылғы 31 шілдеде жарияланған «Сізге уағыз айтуға тыйым салынды. Енді не істейсіз?» атты подкаст анықталған.

Басқарма өкілдерінің айтуынша, аталған сұхбат Дарын Мубаровқа қатысты бұған дейін жарияланған ресми хабарламаға қарамастан әлеуметтік желіде жарияланған.

«Мониторинг барысында Айнұр Асанбердінің 2026 жылғы 31 шілдеде YouTube парақшасында жарияланған «Сізге уағыз айтуға тыйым салынды. Енді не істейсіз?» атты подкасты анықталды. Подкаст Қазақстан Республикасы аумағында тіркеусіз діни миссионерлік қызметпен айналысқан Дарын Мубаровтың қатысуымен түсірілген. Астана қаласының Дін істері жөніндегі басқармасынан хабарландыру болғанына қарамастан, аталған материал әлеуметтік желілерде жарияланған. Материалға құқықтық баға беріледі. Егер діни заңнаманы бұзу белгілері анықталса, қолданыстағы заңнамаға сәйкес тиісті шара қабылданады» деп жазылған басқарманың ресми хабарламасында. 

Еске салайық, биыл көктемде Дарын Мубаров діни мазмұндағы материалдарды заңсыз таратқаны үшін әкімшілік жауапкершілікке тартылып, оған 865 мың теңге көлемінде айыппұл салынған болатын. Ресми мәліметке сәйкес, ол бұған дейін де осыған ұқсас құқық бұзушылық үшін әкімшілік жауапкершілікке тартылған.

Оқи отырыңыз: 

• Көктал ауылы көмек сұрауда: Тұрғындар мектепсіз, көпірсіз, ауруханасыз өмір сүріп жатыр
• Атыраудағы қасірет: Үш жасар қыз анасының өліміне куә болған