Тоқаевтың 30 жылдан бері айтқан ой-толғамдары бір кітапқа топтастырылды

Қазақстанда «Әділетті қоғамға шыншыл сөз» атты кітап жарық көрді. Бұл еңбекте Қазақстан Республикасының президенті Қасым-Жомарт Тоқаевтың таңдаулы ой-пікірлері жинақталған, деп хабарлайды Orda.kz.       

Бұл туралы президенттің ішкі саясат және коммуникациялар мәселелері жөніндегі көмекшісі Арман Қырықбаев өзінің Facebook-тегі жеке парақшасында хабарлады.

Басылым 1994 жылғы архивтік материалдардан бастап мемлекет басшысының соңғы сөздеріне дейінгі отыз жылдан астам уақытты қамтиды. Жинаққа оның Қазақстанда да, халықаралық беделді алаңдарда да айтқан негізгі тұжырымдары мен ең маңызды пікірлері енгізілген.

Кітап материалдары 21 тақырыптық бөлімге бөлінген. Негізгі тақырыптар қатарында заң үстемдігі, қоғамдық қауіпсіздік, мемлекеттік басқару, білім беру және жастар, цифрландыру, ұлттық бірегейлік, экологиялық мәдениет және «Таза Қазақстан» бастамасы бар.

Бұл кітап Қасым-Жомарт Тоқаевтың мемлекеттік құрылыс пен қоғам дамуына қатысты көзқарастарының қалыптасуы мен сабақтастығын айқын көрсетеді. Әр жылдары айтылған ойлары президенттің әділеттілік, заңдылық, жауапкершілік және ұлттық бірлік қағидаттарын тұрақты түрде ұстанғанын дәлелдейді.

Басылым мемлекеттік қызметшілерге, оқытушыларға, студенттерге, жас мамандарға, зерттеушілерге және Қазақстанның қазіргі тарихы мен дамуына қызығушылық танытатын оқырмандарға арналған.

Жақын уақытта кітаптың таралымы қоғамдық кітапханаларға, университеттерге, колледждерге, саяси партияларға және жастар ресурстық орталықтарына жолданады деп жоспарланып отыр.

Оқи отырыңыз:

• Президент: Басты мақсат – елімізді Еуропа мен Азияны жалғастыратын жетекші логистикалық желіге айналдыру
• UIM F1H2O әлем чемпионаты: Орталық Азия мемлекеттері президенттері қатысты